“Kimdir ishdan ketdi, kimdir balki bundan ham jiddiyroq jazo oladigan bo‘ldi” — Xayrulla Nuriddinov

Shavkat Mirziyoyev 16-yanvar kuni energetika tizimidagi muammolar yuzasidan yig‘ilish o‘tkazib, bir qancha mas’ullarni lavozimidan ozod qilgandi. “Menimcha” ko‘rsatuvining navbatdagi sonida Xayrulla Nuriddinov mazkur masalaga to‘xtaldi.

“Yuzaga kelgan vaziyat biz bilgan va bilmagan ko‘pgina sabablarga bog‘liq. Eng asosiysi, daqqiyunusdan qolgan isitish sistemasi yillar davomida modernizatsiya qilinmay, qolib ketgan. Ancha yillar avval yo‘l qo‘yilgan kamchiliklar mevasini esa bugunga kelib yeb o‘tiribmiz.

Sabablardan yana bittasi issiqlik bilan ta’minlash uchun mas’ul bo‘lgan ayrim mutasaddilar o‘z vazifasiga panja orasidan qaragani, qattiq sovuqqa lozim darajada tayyorgarlik ko‘rmaganidir. Ular oladiganini oldi.

Tugayotgan haftaning boshidayoq prezident o‘tkazgan shoshilinch yig‘ilishda aybdor mutasaddilar jazosini oldi. Kimdir ishdan ketdi, kimdir balki bundan ham jiddiyroq jazo oladigan bo‘ldi. Eng muhimi xalq sovuqda yolg‘iz va ilojsiz qolmasligi uchun davlat hamma kuchni tashladi. Hukumatning hamma tuzilmalari safarbar etildi”, — deydi jurnalist.

Shavkat Mirziyoyev raisligida o‘tkazilgan yig‘ilishda Toshkent shahri hokimi Jahongir Ortiqxo‘jayev lavozimidan ozod etilgandi. Sobiq hokim prezident yig‘ilishidan oldin Toshkentdan chiqib ketishga uringan bo‘lishi mumkin.

Bundan tashqari, energetika vaziri o‘rinbosari Sherzod Xojayev lavozimidan ozod etilgan. Toshkent viloyati hokimi Zoir Mirzayev qat’iy ogohlantirildi, Chirchiq shahar hokimiga “hayfsan” berilgandi.

Mavzuga doir: “Elektr va gaz tarmoqlarida talon-torojlik bo‘lganini, tuman hokimlari va sektor rahbarlari, elektr va gaz idoralari boshliqlari bilmasmidi?” — Shavkat Mirziyoyev