Britaniyaning global yaxtachilik sanoatidagi voqealarni yorituvchi Yachting Pages nashri Xorvatiyada Irina VU yaxtasining g‘oyib bo‘lishi bilan bog‘liq xabarlarni sahifasidan o‘chirib tashladi.
Ommaviy axborot vositalarida mazkur yaxta 2021-yili Xorvatiyada hibsga olingani va oktabr oyida Murter orolidagi Betina portidan sezdirmay suzib ketgani xabar qilingan. Yachting Pages o‘z maqolasida yaxta Alisher Usmonov va uning sobiq rafiqasi, Butunrossiya badiiy gimnastika federatsiyasi prezidenti Irina Viner Usmonova bilan bog‘liq tuzilmalarga tegishli ekanini taxmin qilgan.
O‘z navbatida, Usmonovning vakili tadbirkor “Xorvatiya matbuotida tilga olingan Irina VU yaxtasiga egalik qilmasligi va uning Betina portidan g‘oyib bo‘lishi bilan hech qanday aloqasi yo‘qligini” aytgan. Usmonov rafiqasi bilan 2022-yilning yozida ajrashgani eslatib o‘tilgan.
Shundan so‘ng Yachting Pages xabarlarini qaytarib olgan va “yaxta Alisher Usmonovga tegishli ekani va ... u oligarx ekanini” rad etgan. Shuningdek, nashr “noaniqlikka yo‘l qo‘ygani” uchun uzr so‘ragan.
Eslatib o‘tamiz, o‘tgan haftada Alisher Usmonov advokatlari nemis matbuotidagi o‘ziga nisbatan ayblovlar ilgari surilgan maqolalar bo‘yicha raddiya berilishiga erishdi. Bundan tashqari, ular Myunxen prokuraturasini o‘z veb-saytidan Usmonovga nisbatan ishonchsiz ayblovlar tarqatilgan press-relizni olib tashlashga ham muvaffaq bo‘ldi.
Izoh (0)