“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 15-soni mavzusi “Toshkent: yo‘qotishlar va topishlar” bo‘lib, dastur mehmoni sifatida jurnalist Baxtiyor Nasimov taklif etildi.
Jurnalist 50–60 yil ilgarigi Toshkent bilan hozirgisini taqqoslar ekan, yo‘qotilgan qaysi boyliklarga achinishi haqida gapirdi.
— Bugun Paxtakordan Beshyog‘ochga ketadigan yo‘lda yoki Qoratoshdagi Mediapark tomonlarda qachonlardir tramvay yurganini ko‘pchilik bilmaydi. Yo‘qotishlar bo‘lishi tayin, albatta. Toshkent sahro emas, nimadir qurish uchun nimanidir buzish kerak — taroziga solganda qaysi biri afzalroq ekanligi bilinadi. 40–50 yoshdagi kishilar, masalan, hozirgi Tashkent City o‘rnida Kinochilar uyi bo‘lganini eslaydi. Men undan ham avvalgi paytlarni eslayman — u yerda sinfdoshlarimning uylari joylashgan jarlik bo‘lar, jardan to‘g‘ri yursangiz, Chorsuga borardingiz. Hatto “Paxtakor” stadioni o‘rni ham chuqurlik bo‘lgan (toshkentliklar bayram qilganda shu yerga borardi), chuqurning u yoq-bu yog‘ini tekislab stadion qilishgan. Masalan, Kinochilar uyi ham o‘ziga xos, zamonaviy, chiroyli edi, qoldirsa bo‘lardi. Lekin bizda sallani so‘rasa, kalla u yoqda tursin, oyog‘ini ham qo‘shib olib kelishadi.
1876-yili Toshkentda ekilgan chinorlar qancha suvni ushlab turardi, bilasiz, 2009-yil oktabr-noyabrda ularni arralab tashlashdi. Shundan so‘ng metro stansiyasini ham suv bosa boshladi, bularning hammasi bejiz emas, muvozanatni ushlay olish kerak edi.
Ayrim binolarni yo‘qotganimiz juda achinarli, lekin men eng afsuslanadiganim — tramvayni yo‘qotganimiz. Bitta tramvay 70 nafar odam tashiydi, tasavvur qiling, bitta tramvay bor, 70 ta mashina yo‘q. Bugun ham yo‘lda ketayotganimda haydovchi yo‘llarni kengaytirish kerak, deb aytib qoldi. Yo‘lni kengaytirish bilan ish bitmaydi, jamoat transportini yaxshi tashkillashtirish kerak. Navoiy ko‘chasida ham alohida “polosa” qilib qo‘yilgan, ustidan bosib yurishibdi. Tramvayga, daraxtlarimizga, saqlab qolish mumkin bo‘lgan binolar buzilib ketayotganiga juda achinaman, — deydi jurnalist.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)