Korrupsiyaga qarshi kurashish agentligi tomonidan Jizzax viloyatida o‘tkazilgan o‘rganishda viloyat ko‘p tarmoqli tibbiyot markazi tomonidan tibbiyot uskunalari xarid qilishda qonunbuzilishlarga yo‘l qo‘yilgani aniqlandi.
Xususan, mazkur Tibbiyot markazi 2021-yil 22-dekabrdagi shartnomaga asosan “E.M.S.” MCHJdan 245,2 million so‘mga 2021-yilda Germaniyada ishlab chiqarilgan Eskulap modeldagi jarrohlik uskunalarini xarid qilishi belgilangan.
Tovar yetkazib beruvchi mas’uliyati cheklangan jamiyat tomonidan 2021-yil 28-dekabrdagi hisobvaraq-fakturaga ko‘ra, ushbu modeldagi jarrohlik uskunalari Tibbiyot markaziga yetkazilgani haqida hujjat rasmiylashtirilgan.
Biroq o‘rganishlar mobaynida shartnomada qayd etilgan jarrohlik uskunalari aslida mavjud emasligi, yangi tibbiy uskuna o‘rniga eski — 1994-yilda Rossiyada “Voljskiy UTYOS”da ishlab chiqarilgan jarrohlik uskunalari olib kelingani hamda ular yaroqsiz holatda ekani aniqlandi.
Tibbiyot markazining mas’ul shifokor va xodimlari o‘z rahbariyatiga ushbu tibbiy uskunalar SanPiN talablariga javob bermasligi va boshqa holatlar to‘g‘risida 2022-yil 19-fevralda bildirishnoma bilan murojaat qilingan bo‘lishiga qaramay, rahbariyat tomonidan holat bo‘yicha hech qanday chora ko‘rilmagan.
Mazkur holatlar yuzasidan to‘plangan materiallar agentlik tomonidan qonuniy qaror qabul qilish uchun Bosh prokuraturaga yuborilgan. Jizzax viloyati Ko‘p tarmoqli tibbiyot markazi mansabdor shaxslariga nisbatan Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atilgan va hozirgi kunda tergov harakatlari olib borilmoqda.
Izoh (0)