Ikki hafta ichida dunyo bo‘ylab qariyb 600 mlrd dollarlik obligatsiyalar chiqarildi. Bu rekord

Yanvar oyining dastlabki ikki haftasida dunyo bo‘ylab 585 milliard dollarga teng rekord miqdoridagi obligatsiyalar chiqarildi. Bu haqda Bloomberg xabar bermoqda. 

Mazkur raqamlar agentlik 1999-yildan beri olib borgan bunday hisob-kitoblarning butun davri uchun maksimal ko‘rsatkich va o‘tgan yilning mos davri uchun 4 foizga ko‘p. Avvalgi rekord 2020-yilda qayd etilgandi — 562 milliard dollar.

Tahlilchilar ham korporativ, ham suveren emitentlar tomonidan chiqarilgan obligatsiyalarning rekord hajmini jahonning yetakchi markaziy banklari foiz stavkalarini oshirish bilan izohlamoqda, ular shu tariqa inflyatsiyaga qarshi kurashishga harakat qilmoqda.

“Bizning fikrimizcha, obligatsiyalar sohasida o‘sib borayotgan faollik juda kuchli poydevorga ega, ayniqsa gap investitsiya darajasidagi bozorlar haqida ketganda”, — deydi PineBridge Investments brokerlik kompaniyasi vakili Omar Slim. 

Emitent — o‘z faoliyatini rivojlantirish va moliyalashtirish uchun qimmatli qog‘ozlarni chiqaradigan (emissiya qiluvchi) kompaniya yoki tashkilot.

Obligatsiya — qiymatiga nisbatan egasiga (qat’iy belgilangan daromad keltiruvchi) qimmatli qog‘oz, qarzni qaytarib berish va foiz to‘lashni tasdiqlovchi majburiyatnoma. 

2022-yilda global fond va obligatsiya bozorlari 30 trillion dollardan ko‘proq zarar ko‘rgan edi.