Anomal sovuq davrida Surxondaryo viloyatida aholi va ijtimoiy soha obyektlarini uzluksiz elektr energiyasi bilan ta’minlash maqsadida qo‘shni Tojikiston Respublikasidan qo‘shimcha elektr energiyasi yetkazib berish yo‘lga qo‘yildi. Bu haqda “Daryo”ga “Hududiy elektr tarmoqlari” AJ Surxondaryo hududiy filiali axborot xizmati rahbari Azimbek Samadov xabar berdi.
Ma’lum bo‘lishicha, 2023-yil 18-yanvar kuni viloyatning Sho‘rchi, Oltinsoy, Qumqo‘rg‘on, Jarqo‘rg‘on tumanlarining 70 foiz, Bandixon, Qiziriq, Sherobod tumanlarining 90 foiz va Boysun, Sariosiyo, Uzun, Denov tumanlaridagi barcha iste’molchilarga Tojikiston Respublikasining “Regar-500” podstansiyasidan chiquvchi 220kVli L-Regar-Zarchop va L-Regar-Sherobod elektr uzatish tarmoqlari orqali elektr toki yetkazib berilmoqda.
Viloyatimizning Termiz, Jarqo‘rg‘on tumanlarining 30 foizi, Muzrabot, Angor, Sherobod tumanlarining 10 foizi hamda Termiz shahrining elektr energiya iste’molchilari 196 MVt yuklama bilan O‘zbekiston Respublikasi orqali kuchlanish bilan ta’minlanmoqda. Tojikiston Respublikasining “Regar-500” podstansiyasidan chiquvchi 220kVli L-Regar-Zarchop va L-Regar-Sherobod elektr uzatish tarmoqlarining har biridagi simning yuklamani ko‘tarish qobiliyati 250 MVtga mo‘ljallangan bo‘lib, L-Regar-Zarchop va L-Regar-Sherobod elektr uzatish tarmoqlarining birortasida favqulodda o‘chib qolish holatlari yuz bergan vaqtlarda energosistemani saqlab qolish maqsadida Sho‘rchi, Oltinsoy, Qumqo‘rg‘on, Jarqo‘rg‘on, Bandixon, Qiziriq, Sherobod, Boysun, Sariosiyo, Uzun, Denov tumanlari bo‘yicha Janubiy mintaqaviy dispetcherlik boshqarmasi dispetcherlarining topshirig‘i hamda Surxondaryo hududiy dispetcherlik bo‘limi dispetcherining farmoyishi bilan tasdiqlangan cheklash grafigiga asosan 6-10 kVli fiderlardan soatiga 70-80 MVt dan cheklash olib borish taqozo etiladi, — deydi Azimbek Samadov.
Mavzuga doir:
Izoh (0)