O‘zbekiston Sabzavot, poliz ekinlari va kartoshkachilik ilmiy-tadqiqot instituti olimlari tomonidan sarimsoqning “Janub” nomli yangi navi yaratildi. Bu haqda EastFruit xabar berdi.
Ma’lum bo‘lishicha, yangi navning boshqalaridan asosiy ustunligi ertapisharligidir, uning tayyor holatga kelishi 200—215 kunni tashkil etadi. Bu nav juda hosildor, piyoz boshlari yirik-yirik, piyozchalar soni 13 ta bo‘ladi.
“Yangi nav – eksportbop va saqlash muddati ham yaxshi, sentyabr-oktyabr oylarigacha bemalol turadi”, — deydi “Janub” navi muallifi, Sabzavot, poliz ekinlari va kartoshkachilik ilmiy-tadqiqot instituti ilmiy xodimi Bahodir Salomov.
Agar ushbu nav qishki sarimsoq sifatida sentyabr oyining birinchi o‘n kunligida ekilsa, uning hosilini kelgusi yil mart oyining uchinchi o‘n kunligidan boshlab aprel oyining birinchi o‘n kunligigacha bo‘lgan davrda, ya’ni, boshqa navlarga nisbatan 20—25 kun erta yig‘ib olish mumkin.
“Intellektual mulk agentligiga barcha hujjatlarni taqdim qilgan holda nav uchun patent oldik. Endigi vazifamiz — yangi navning urug‘chiligini yo‘lga qo‘yishdir”, — deydi Sabzavot, poliz ekinlari va kartoshkachilik ilmiy-tadqiqot instituti ilmiy kotibi Faxriddin Rasulov.
Izoh (0)