Ishtaha yaxshiligi salomatlik belgisidir. Ochlik hissining sezilmasligi anoreksiya(oshqozon-ichak tizimi bilan bog‘liq holda kelib chiqadigan psixologik xastalik)ga qadar turli xil muammolarga olib kelishi mumkin. Agar ketma-ket bir necha kundan ortiq vaqt mobaynida taom iste’mol qilmasangiz, ishtahangizni qanday yaxshilash haqida o‘ylash vaqti keldi.
Ishtahasizlikni qanday yaxshilash mumkin: foydali maslahatlar
Ishtahani yo‘qotish stress va boshqa muammolar tufayli yuzaga keladi. O‘zingizni majburlab ovqatlanishga undashingiz shart emas. Muammoni shunday hal qilish kerakki, organizmning o‘zi ovqat talab qilsin.
Organizmning o‘zi taom talab qilishga undaydigan kichkina “ayyorliklar” bor:- Kam-kam, lekin tez-tez ovqatlaning. Oshqozon oz miqdordagi ovqatni yaxshiroq qabul qiladi;
- Ko‘p miqdorda toza suv iching, kuniga 2 litrgacha. Ishtaha yo‘qolishining eng keng tarqalgan sabablaridan biri suvsizlanishdir. Chanqamasdan avval suv ichishni unutmang. Chanqoqlik esa organizm allaqachon suvsizlanganligi haqida signaldir;
- Mazali va ishtaha ochar ko‘rinishga ega bo‘lgan taom tayyorlang. Likoplarning to‘g‘ri taqdim etilishini e’tiborsiz qoldirmang, hatto, yolg‘iz ovqatlansangiz ham;
- Turli-tuman oshko‘k va ziravorlardan foydalaning. Ular ishtahani ochish uchun qo‘l keladi;
- Bir vaqtning o‘zida bir turdagi taomdan yeng. Qandolat va bulochkalar kabi qo‘shimchalar bilan ishtahangizni buzmang;
- Vitaminlarni, ayniqsa, kuz-qish davrida iching;
- Chekishni tashlang. Tamakiga qaramlik ishtahani susaytiradi;
- Faol turmush tarzini olib boring, sport bilan shug‘ullaning va toza havoda uzoq vaqt sayr qiling;
Katta yoshli odamning ishtahasini qanday ochish mumkin: xalqona retseptlar
Ba’zi dorivor o‘simliklardan tayyorlangan preparatlar ishtahani yaxshilashi mumkin. Ishtahani qitiqlovchi o‘tkir ta’mga ega bo‘lgan o‘simliklar mavjud. Ishtahani yaxshilaydiganlar uchun ayrim retseptlar:
- 1 osh qoshiq quritilgan shuvoq o‘simligi ustiga 1 stakan qaynoq suv quying. Damlanishini kuting. Kuniga uch marta ovqatlanishdan avval bir osh qoshiqdan iching;
- Ovqatdan oldin kuniga uch marta 1 osh qoshiq miqdorda aloe suvidan iching. Juda nordon bo‘lmasligi uchun unga ozgina asal qo‘shishingiz mumkin;
- Shuvoq, momaqaymoq, mingyaproq va tol po‘stlog‘ini 1: 1: 1:2 nisbatda aralashtiring. 1 osh qoshiq aralashmaga 1 yarim stakan qaynoq suv quying. Yarim soatga qoldiring. Ovqatdan 20 daqiqa oldin yarim stakandan kuniga uch mahal iching.
Balki, organizm sizga qandaydir kasallik haqida belgi berishga urinmoqda, shuning uchun ovqatlanishni rad etayotgandir.Dastavval, siz ishtaha yomonligining sababini bilishingiz kerak. Gormonal muvozanatning buzilishi, ovqat hazm qilish tizimi organlari bilan bog‘liq muammolar (gastrit, pankreatit, jigar yetishmovchiligi va boshqalar), buyrak yoki yurak yetishmovchiligi, onkologiya, psixologik omillar (stress, depressiya) kabi xastaliklar ishtahasizlikka sabab bo‘lishi mumkin.
Birinchi navbatda, mutaxassisga murojaat qilishdan oldin ba’zan sog‘liq muammolarini istisno qilish va yondosh kasalliklar mavjudligini anglab yetish kerak. Masalan, agar ayollarda hayz sikli va ishtahasi bilan bog‘liq muammolar bo‘lsa, unda bu muammo xususida ginekologga uchrash tavsiya etiladi. Agar odam ovqatdan keyin oshqozonida og‘riq yoki og‘irlik his qilsa, qorin sohasida burama og‘riq bo‘lsa, u holda gastroenterolog bilan bog‘lanish lozim. Qalqonsimon bez gormonlarining qonda uzoq vaqt davomida yetishmovchiligi metabolizmni sekinlashtiradi va ochlik hissining pasayishiga olib keladi. Bu vaziyatda endokrinolog bilan maslahatlashish o‘rinlidir.
Hamma uchun tavsiya: umumiy tahlil va qonni biokimyoviy analiz qildiring, qalqonsimon bez gormonlari darajasini aniqlang, ichki organlarni ultratovush tekshiruvidan o‘tkazing, gastroskopiya va zarur bo‘lsa kolonoskopiya qiling.
Ishtahaning uzoq vaqt mobaynida yo‘qligiga biror ruhiy kasalliklar yoki turli xil psixologik holatlarning ta’siri bo‘lishi mumkin. Masalan, depressiya, uyqusizlik, apatiya, charchoq kabi. Bu holat markaziy asab tizimida ovqat hazm qilishni sekinlashtiradigan va ishtahani kamaytiradigan stress gormonlarini ishlab chiqarishga sabab bo‘lishi mumkin. Bunday hollarda psixolog bilan muammoni aniqlash va uning sabablarini anglab yetish, zarur bo‘lsa, psixiatr tavsiyasiga ko‘ra muqobil dori-darmonlarni qabul qilish kerak.
Agar yuqorida sanab o‘tilgan muammolarning hech biri kuzatilmasa ham odam shunchaki ovqatlanishdan bosh tortsa, demak, oziq-ovqatning ta’mi va hidiga individual xususiyatlar bo‘lishi ehtimoli bor. Balki u shunchaki o‘ziga mos kelmaydigan taomni tanlayotgandir. Buni aniqlash uchun faqatgina parhez bilan tajriba o‘tkazib ko‘rishi mumkin.
Mavzuga doir:
Izoh (0)