2022-yil oxirida Hindiston aholisi, World Population Review (WPR) hisob-kitoblariga ko‘ra, 1,417 milliard kishini tashkil qildi — bu Xitoy aholisidan 5 millionga ko‘p demakdir, u yerda esa, rasmiy ma’lumotlarga ko‘ra, ko‘rsatkich 1,412 milliard kishiga teng bo‘lgan. Bu haqda Bloomberg xabar berdi.
BMT Hindiston Xitoydan o‘zib ketib, aholi soni bo‘yicha dunyoda yetakchiga aylanishini bashorat qilgan edi, ammo bu keyinroq yuz berishini kutgandi. WPR’ning 18-yanvardagi ma’lumotlariga ko‘ra, Hindiston aholisi yana ko‘payib, 1,423 milliard kishiga tenglashgan. Macrotrends tadqiqot platformasi hisob-kitoblari bo‘yicha ham bu ko‘rsatkich 1,423 milliardni tashkil qiladi.
Hindiston o‘z aholisi soni haqida yangi ma’lumotlarni rasman e’lon qilgani yo‘q. Mamlakat odatda har o‘n yilda bir marta aholini ro‘yxatdan o‘tkazadi, biroq 2021-yilda bu pandemiya tufayli keyinga qoldirilgandi.
BMT prognoziga ko‘ra, Hindiston va Xitoy o‘rtasida aholi soni bo‘yicha farq yaqin yillarda sezilarli darajada ortib boradi. 2050-yilga kelib, Hindiston aholisi 1,688 milliard kishini tashkil qiladi, Xitoyda esa 1,317 milliard kishi yashaydi, degan fikrda tashkilotdagilar.
Umuman olganda, Kongo Demokratik respublikasi, Misr, Efiopiya, Hindiston, Nigeriya, Pokiston, Filippin va Tanzaniya aholisi eng ko‘p o‘sishi kutilmoqda. BMT prognoziga ko‘ra, 2050-yilgacha kutilayotgan aholi soni o‘sishining yarmidan ko‘pi shu mamlakatlar hissasiga to‘g‘ri keladi.
Eslatib o‘tamiz, 2022-yilda Xitoy aholisi soni 850 ming kishiga qisqarib, 1 milliard 411 million 750 ming kishiga tushib qoldi. So‘nggi marta bu ko‘rsatkich 1961-yilda, mamlakatda ommaviy ocharchilik kuzatilgan vaqtda pasaygan edi. Bir yil ichida mamlakatda 9,56 million kishi tug‘ilib, 10,41 million kishi vafot etgan.
Izoh (0)