Global inflyatsiya eng yuqori cho‘qqiga chiqdi, ammo uning tarkibiy qismlari hali ham bir qator mamlakatlarda o‘sib borishi mumkin. Bu haqda Xalqaro valyuta jamg‘armasi (XVJ) boshqaruvchi direktorining birinchi o‘rinbosari Gita Gopinath Davosdagi Jahon iqtisodiy forumida ma’lum qildi.
“Bizning hisob-kitoblarga ko‘ra, global inflyatsiya allaqachon eng yuqori cho‘qqiga chiqdi. Ammo bu hodisaning tarkibiy qismlariga, masalan, xizmat ko‘rsatish sohasidagi inflyatsiyaga kelsak, u hali ham o‘sib borayotgan mamlakatlar bor”, — dedi u.
Rasmiyning qo‘shimcha qilishicha, 2023-yil dunyo uchun “qiyin” yil bo‘lsa-da, XVJ hech bo‘lmaganda joriy yilning yanvar oyi oxirida ketma-ket to‘rtinchi marta global o‘sish prognozini pasaytirmaslikni rejalashtirmoqda.
“Uch marta ketma-ket pasayishdan so‘ng, hech bo‘lmaganda, bu safar biz eng yomon ssenariyni kutmaymiz”, — deb tushuntirdi u.
2021-yil oktabr oyidan buyon XVJ global o‘sish prognozini uch marta pasaytirdi. So‘nggi ma’lumotlarga ko‘ra, jamg‘arma joriy yilda global yalpi ichki mahsulot o‘sishi 2,7 foizgacha sekinlashishini taxmin qilmoqda.
Davosdagi forumda so‘zga chiqqan XVJ boshqaruvchi direktori Kristalina Georgiyeva bu ko‘rsatkich 2023-yilda pastga tushishini, ammo kelgusi yilda global iqtisodiy o‘sish tezlashishini ta’kidladi.
Avvalroq Jahon iqtisodiy forumining ekspertlari 2023-yilda jahon iqtisodiyotida retsessiya yuz berishini prognoz qilgani haqida xabar berilgandi.
Izoh (0)