Pentagon Ukrainaga Isroil armiyasi omborlaridagi 155 millimetrli snaryadlarni yubormoqda. Bu haqda The New York Times gazetasi amerikalik va isroillik mansabdorlarga tayanib xabar berdi.
Nashr ma’lumotlariga ko‘ra, AQSH Ukrainaga arab-isroil nizosidan keyin 1970-yillardayoq yaratilgan Amerika omborlaridagi qurollarni yetkazib bermoqda. 2022-yilda AQSH va Isroil Ukrainaga 155 kalibrli 300 mingta snaryad yetkazib berish haqida bitim imzolagan edi. Gazeta ma’lumotlariga qaraganda, snaryadlarning deyarli yarmi allaqachon Yevropaga yo‘naltirilgan.
2022-yil fevrali boshidan buyon Ukraina hukumati Isroildan “Temir gumbaz” havo hujumiga qarshi mudofaa tizimlari va Spike tankka qarshi raketalarini so‘rab kelayotgan edi. 2022-yil oktabrida Isroil mudofaa vaziri Beni Gans uning mamlakati Ukrainaga qurol sotmagani va sotmasligini ham aytdi. Isroil hukumati da’vo qilishicha, harbiy yordam o‘rniga ular Ukrainaga tibbiy va gumanitar yordam yetkazib bermoqda.
Axios gazetasi manbalariga ko‘ra, Isroil Rossiya uning Suriyadagi manfaatlariga yetkazishi mumkin bo‘lgan zarardan xavfsiramoqda. Isroilning Haaretz gazetasi manbalariga tayanib, Isroil AQSH bosimi ostida Ukrainaga millionlab dollarlik allaqanday “strategik materiallar” yetkazib berishni moliyalashtirgani haqida xabar bergandi.
Izoh (0)