O‘zbekiston prezidenti huzuridagi Davlat boshqaruvi akademiyasi delegatsiyasi Singapurga xizmat safari mobaynida bosh vazir tizimidagi Davlat xizmati departamenti, Li Kuan Yu davlat siyosati maktabi hamda Davlat xizmati kolleji rahbariyati bilan muzokaralar olib bordi.
Dastlabki kelishuvga ko‘ra, 2023-yil mobaynida 200 nafarga yaqin davlat xizmatchilari, shuningdek, 15 nafar akademiyaning professor-o‘qituvchilari va ilmiy tadqiqotchilari yuqoridagi ta’lim muassasalarida malaka oshiradi va stajirovkadan o‘tadi.
Singapur tomoni bilan hamkorlikda 3 yarim haftalik (1 yarim hafta Toshkentda va 2 hafta Singapurda) maxsus malaka oshirish kursi ishlab chiqiladi. Kursning birinchi haftasi akademiyada tayyorlov kursi sifatida tashkil etiladi, Singapurdan qaytgandan so‘ng ishtirokchilar akademiyada loyihani himoya qiladi.
Akademiyada magistratura va doktorantura dasturlarini transformatsiya qilish, o‘quv rejalari va modullarini xalqaro ekspertiza qilishda Singapur tomoni olimlari va ekspertlari faol ishtirok etadi. 2023-yilda hamkorlikda kamida 2 ta ilmiy-innovatsion va tadqiqot tadbiri hamda 5 ta ilmiy-ommabop maqola orqali Singapurda davlat siyosati va boshqaruvi ilg‘or tajribasi O‘zbekistonda targ‘ib qilinadi.
Hozirda Singapur Davlat siyosati maktabida 4 ta yo‘nalishda magistratura:
- Davlat siyosati (2 yil);
- Xalqaro aloqalar (2 yil);
- Davlat boshqaruvi (1 yil);
- Davlat boshqaruvi va menejment (1 yil, xitoy tilida) hamda ilmiy tadqiqotchilik (PhD) dasturlari mavjud.
Davlat siyosat maktabi o‘zi qanaqa maktab?
Davlat siyosati maktabi Global davlat siyosati maktablari tarmog‘i a’zosi hisoblanadi. Maktabning Davlat siyosati yo‘nalishi bo‘yicha magistratura tinglovchilari Kolumbiya universiteti, London iqtisodiyot maktabi, Tokio universitetlari bilan ikki darajali (Double degree) dasturlarida ta’lim olish imkoniyatiga ega.2010-yildan buyon Davlat siyosati maktabida davlat xizmatchilari va xususiy sektor vakillari qisqa muddatli o‘quv kurslarida malakalarini oshirib kelmoqda. Shuningdek, har yili dunyoning 90 dan ortiq mamlakatlaridan kelgan 2000 dan ortiq yuqori toifali mutaxassislar uchun qisqa muddatli o‘quv dasturlari amalga oshiriladi. Mazkur qisqa muddatli dastur tinglovchilarining 80 foizini xalqaro tinglovchilar tashkil qiladi.
Davlat siyosati yo‘nalishi bo‘yicha davlat siyosatining asoslari, XXI asrda davlat siyosati muammolari, davlat siyosati jarayonlari, siyosat institutlari va ishtirokchilari, siyosatni aniqlash va baholash, raqamli asrda davlat siyosati, davlat siyosatini ishlab chiquvchilar uchun yetakchilik va etika kabi fanlar o‘qitiladi.
Shavkat Mirziyoyev korrupsiyaga qarshi kurashish, kadrlarning ongini o‘zgartirish, yangi zamon kadrlarini shakllantirish muhimligini o‘tkazilgan selektorlarda bir necha bor ta’kidlagan. Singapurga tashrif doirasida ham ushbu mavzularga bag‘ishlangan muhokamalar bo‘lishi kutilmoqda. 4,7 milliard dollargacha qo‘shimcha investitsiya jalb qilish rejalashtirilgani uchun ham bu tashrif muhim ahamiyatga ega. Xususan, samarasiz ishlayotgan davlat korxonalarini xususiylashtirishga ham investitsiyalar jalb qilinadi.
Izoh (0)