Bitkoin yaralganiga 14 yil bo‘ldi: kriptovalyuta narxi FTX bankrot bo‘lgandan beri birinchi marta 19 ming dollardan oshdi

Bitkoin 19 000 dollarga yaqin sotilmoqda, bu FTX kripto birjasi bankrot bo‘lgan — noyabr oyining boshidan beri eng yuqori ko‘rsatkich. 

CoinDesk portalida ma’lumotlarga ko‘ra, Toshkent vaqti bilan 13-yanvar, soat 19:10 ga kelib bitkoin narxi 18 900 dollar atrofida bo‘lib turibdi. 

So‘nggi 24 soat ichida dunyodagi eng yirik kriptovalyuta 19,1 ming dollargacha baholandi. Bu 2022-yilning noyabr oyidan beri eng yuqori ko‘rsatkich. 

O‘shanda FTX kriptobirjasi bankrotligi ortida ko‘plab kriptobirjalar qatorida kriptovalyutalar ham jiddiy zarar ko‘rgan edi. Bitkoin ham shundan keyin 16 ming dollardan ham pastlagan edi. 

Kun davomida ikkinchi eng mashhur kriptovalyuta efir narxi deyarli 18 foizga oshib, ayni paytda 1 400 dollar atrofida bo‘lib turibdi. 

Bozor AQSHning makroiqtisodiy ma’lumotlari bilan qo‘llab-quvvatlandi, bu esa investorlarning AQSH Federal rezerv tizimi (Fed) asosiy stavka o‘sishini sekinlashtirishiga ishonchini kuchaytirdi. Biroq, bozor ishtirokchilari kriptovalyutalar qiymatining yanada o‘sishini kutmayapti.

Ekspertlar raqamli valyutalarning tiklanishi Fed’ga nisbatan pul-kredit siyosatini yanada qat’iylashtirish haqidagi qo‘rquvning kamayishi bilan bog‘liq, deya ta’kidlamoqda. 

Bunga mamlakatdagi yangi ish o‘rinlari va iste’mol narxlari haqidagi so‘nggi ma’lumotlarning e‘lon qilinishi yordam berdi.

Dekabr oyida AQSH iqtisodiyotida ish o‘rinlari soni 223 mingtaga oshgan. Tahlilchilar esa atigi 203 mingta o‘sishni kutgan edi.

11-yanvar kuni birinchi bitkoin tranzaksiyasi yuborilganiga 14 yil to‘ldi. 2009-yilning aynan shu sanasida Satoshi Nakamoto taxallusli kriptograf kompyuter olimi Xel Finniga 10 bitkoin (BTC) yuborgandi.