AQSHda talabalar ovqat ta’mini yaxshilaydigan qoshiq ixtiro qildi

AQSHda Kornel va Nyu-York universiteti talabalari ta’m sezgilarini rag‘batlantirish orqali taomning ta’mini yaxshilaydigan maxsus qoshiq yaratdi. Bu haqda Scientific American xabar berdi.

Bo‘lajak olimlar maxsus oshxona anjomi yordamida kerakli natijaga erishgan. Ular ixtiro qilgan qoshiqning qoplamasi og‘izdagi retseptorlarga shunday ta‘sir qiladiki, shirin yoki sho‘r ta’m paydo bo‘ladi. Qoshiqning pastki qismida bir nechta bo‘rtiqlar bo‘ladi, ular ligandlar deb ataladigan barqaror molekulalar qatlami bilan qoplangan.

Ligandlar ta’m hujayralari yuzasida retseptor oqsillariga ta’sir qiladi. Bu neyron signallarga ta’sir o‘tkazib, miyada shirinlik ta’mini qayd etishga olib keladi. Tadqiqotchilarning fikricha, ularning Sugarwave deb nomlangan loyihasi qandli diabetga chalinganlarga yordam berishi kerak. AQSHda mamlakat aholisining 11 foizdan ortig‘i qandli diabetdan aziyat chekadi.

Talabalarning qo‘shimcha qilishicha, ular yapon olimlari tomonidan ilgari o‘tkazilgan tajribadan ilhomlangan. Yaponlar zaif elektr toki orqali ovqatning tuzini kuchaytiruvchi tayoqchalar yaratgan.

Mavzuga doir:

• Shakar inson organizmiga qanday ta’sir ko‘rsatadi?
•  Qandli diabetning bilib qo‘yish muhim bo‘lgan 9 ta belgisi