Qor ko‘chkisi xavfi sababli 4-yanvar kuni soat 00:00 dan Qamchiq dovoni avtomobillar harakati uchun vaqtincha yopilgandi. FVV dovon yo‘lida qolib ketgan yo‘lovchilarga maxsus reys orqali poyezd qatnovi yo‘lga qo‘yilib, isinish maskanlari tashkil etilganini ma’lum qildi.
Qayd etilishicha, zudlik bilan Angren-Land oshxonasida FVV rahbarligida daxldor korxona va tashkilotlarning mas’ul va mutasaddilaridan iborat fuqarolarni qabul qilish — evakuatsiya shtabi tuzilib, “O‘zbekiston temir yo‘llari” AJ hamkorligida yo‘lda qolib ketgan yo‘lovchilarga maxsus reys orqali poyezd qatnovi yo‘lga qo‘yildi va isinish maskanlari tashkil etildi.
Qamchiq dovoni yo‘llarida qolib ketgan haydovchilarga FVV qutqaruvchilari tomonidan amaliy yordam ko‘rsatildi. Shuningdek, Angren-Land, “Zamin-2”, “Uchquduq” oshxonalari fuqarolarni vaqtincha qabul qilish hamda “Angren kon metallurgiya” texnikumi, “Fayz”, “Shodiyor”, “Elba” mehmonxonalari esa joylashtirish uchun faoliyat olib bordi.
Qamchiq dovoni vaqtincha yopilib qolgan vaqtda “Qamchiq avtoyo‘l” va “Qamchiq” maxsus qidiruv, yong‘in-qutqaruv boshqarmasi, Toshkent viloyati FVBdan jami 113 ta maxsus texnika hamda 250 nafar shaxsiy tarkib xizmatga jalb etildi.
“Hurmatli fuqarolar! Qamchiq dovonida ob-havo barqaror bo‘lmaguniga qadar dovon orqali vaqtinchalik harakatlanmaslikni tavsiya etamiz”, — deyiladi vazirlik xabarida.
Izoh (0)