O‘zbekiston bosh konsulxonasi vakillari Toshkent—Olmaota yo‘nalishida parvoz qilgan samolyot kuchli turbulentlik zonasiga tushib qolishi oqibatida jabrlangan vatandoshlar bilan uchrashdi, deb xabar bermoqda “Dunyo” AA.
Transport vazirligi bergan ma’lumotga ko‘ra, 2-yanvar kuni Toshkent—Olmaota yo‘nalishi bo‘yicha KC128 reysini amalga oshirish chog‘ida bortida 135 yo‘lovchi va 9 nafar ekipaj a’zosi bo‘lgan Air Astana samolyoti Chimkent parvozlarni boshqarish markazi hududida 350 (10600 m) balandlikda kuchli turbulentlikka uchradi. Hodisa natijasida 7 kishi (shundan 3 nafari O‘zbekiston fuqarosi) jabrlangan.
O‘zbekiston diplomatlari 2-yanvar kuni jabrlanganlarga birinchi tibbiy yordam ko‘rsatish uchun yetkazilgan 4-sonli shahar klinik shifoxonasida bo‘ldi.
Bosh konsulxona ma’lumotiga ko‘ra, 12 yoshli o‘zbekistonlik hech qanday shikoyati yo‘qligi sabab unga uyiga borishga ruxsat berilgan. Uning onasi ham shifokorlar ko‘rigidan o‘tib, yashash joyiga ketgan. Qo‘lidan yengil jarohat olgan yana bir O‘zbekiston fuqarosi ham vaqtinchalik yashash joyiga jo‘nab ketgan.
Air Astana vakillarining aytishicha, O‘zbekiston fuqarolariga yordam ko‘rsatish uchun zarur bo‘lgan barcha dori-darmonlar aviakompaniya hisobidan xarid qilingan.
“Bosh konsulxona xodimlari jabrlangan yurtdoshlarimiz bilan zarur konsullik va huquqiy yordam ko‘rsatish uchun doimiy aloqada bo‘lib turibdi”, — deyiladi xabarda.
Izoh (1)
манга йокмади бу приложении