2022-yilda YouTube tarmog‘ida eng ko‘p ko‘rilgan o‘zbek kliplari qaysi ekanligini bilasizmi? Marhamat kuchli 20 talikdan o‘rin olgan kliplarni tomosha qiling.
20-o‘rin
2022-yilda muhokamalar markazida bo‘lgan xonanda Dildora Niyozovaning turmush o‘rtog‘iga bag‘ishlab ijro etgan “Muhabbatjon” klipi 5 oyda 6,7 million marta ko‘rilgan. Klipda xonandaning o‘zi va turmush o‘rtog‘i suratga tushgan.
19-o‘rin
Yulduzli juftlik Oybek va Nigoraning “Sog‘inganman” qo‘shig‘i ham yaxshi natijalarni qayd etgan. Ya’ni klip 7 oy mobaynida 9,6 mln marta tomosha qilingan. Ikki oy avval YouTube tarmog‘iga joylangan “Sovg‘a qil” klipi esa 6 million marta ko‘rilgan.
18-o‘rin
Xonanda Nilufar Usmonovaning “Onam” taronasiga ishlangan klip 9 oy mobannida 7,8 million marotaba tomosha qilingan. “Xatlar yozmayman” klipi esa 3 oy mobaniyda 3 million marotaba tomosha qilingan. To‘g‘ri, ijodkorning kliplari tarmoqda u qadar ko‘p ko‘rilmagan bo‘lsa-da, yakunlanayotgan yil unga muvaffaqiyatli keldi. Chunki u ilk yakkaxon konsertini katta saroyda o‘tkazdi.
17-o‘rin
Xonanda Sardor Mamadaliyevning 7 oy avval YouTube tarmog‘iga joylangan “Bir kecha” klipi ham kuzatuvchilar tomonidan iliq qarshi olingan. Klip ikkita kanalga joylangan va ikkisida ham 12 million marotaba tomosha qilingan.
16-o‘rin
Xonanda Shohruhxonning “Ey yor” va “Salom, sevgi” qo‘shiqlari ham qisqa vaqt mobaynida “xit”ga aylandi. “Ey yor” qo‘shig‘i 6 oyda 12 million, “Salom, sevgi” esa 4 oyda 10 million marotaba tomosha qilindi.
15-o‘rin
Xonanda Ozoda Nursaidovaning “Yomg‘irlarda” qo‘shig‘iga ishlangan 2022-yilning noyabr oyida premyera qilingandi. Klip juda qisqa vaqt mobaynida 15 million marotaba tomosha qilindi. Bu ko‘rsatgich yanada oshishiga ishonchimiz komil.
14-o‘rin
Yosh xonanda Jambul Muhammedovning “Kabutar” qo‘shig‘i yilning eng xit taronalaridan biri bo‘ldi. Qo‘shiqqa ishlangan klip YouTube tarmog‘ida 6 oy mobaynida 16 million marotaba ko‘rildi.
13-o‘rin
O‘zbekistonda xizmat ko‘rsatgan artist Ulug‘bek Rahmatullayev qo‘shig‘iga ishlangan “Yolg‘onchim” qo‘shig‘i ham yilning xit taronalaridan biri bo‘ldi. Qo‘shiq YouTube tarmog‘ining ikkita kanaliga joylangan. Xonandaning rasmiy kanalida klip 16 million, ikkinchisida esa 9,4 million marotaba tomosha qilingan.
12-o‘rin
Internet yulduzlaridan biri Sevinch Ismoilova ham yakunlanayotgan yilda sermahsul ijod qildi. Uning 3 oy avval YouTube tarmog‘iga joylangan “Go‘mirchimi” qo‘shig‘i va 7 oy avval ishlangan “Qashqadaryo-Surxondaryo” klipi bir xil natijani qayd etdi. Ularning ikkisi ham 17 million marotaba tomosha qilingan.
11-o‘rin
Bu o‘rinni xonanda Rayhon G‘aniyeva “Aldandim” taronasi va unga ishlangan klip bilan egalladi. Klip 6 oy mobaynida 22 million marotaba tomosha qilingan.
10-o‘rin
Insta-bloger Azoda xonandalik faoliyatini boshlaganiga ko‘p bo‘lmagan bo‘lsa-da, bugungi reytingdan o‘rin egalladi. Boisi, uning 5 oy avval YouTube tarmog‘iga joylangan “Sog‘inasan” klipi 26 million marotaba tomosha qilindi.
9-o‘rin
Xonanda Munisa Rizayevaning o‘tgan yil yakunida YouTube tarmog‘iga joylagan “Yetmadimi”taronasi yil davomida 29 million marotaba tomosha qilindi. Ammo undan keyin joylagan kliplari bu natijani zabt etolmadi.
8-o‘rin
Qoraqalpog‘istonlik yosh ijodkor Boburbek Arapbayevning “Tamara” qo‘shig‘iga ishlangan klip esa 9 oy mobaynida 35 mln marotaba tomosha qilingan. Xonanda xalq orasida u qadar tanilmagan bo‘lsa-da, uning qo‘shig‘i o‘zbek internet foydalanuvchilari orasida ko‘p izlanadi.
7-o‘rin
Internet yulduziga aylangan qoraqalpog‘istonlik ijodkor Gulinurning Jasurbek Mavlonov bilan kuylagan “Jaylan” taronasi 6 oy mobaynida 36 million marotaba tomosha qilindi. Noodatiy klip va klip ikki ijodkorga ham katta daromad va mashhurlik olib keldi.
6-o‘rin
Xonanda Yorqinxo‘ja Umarovning “Yomg‘ir” qo‘shig‘i 6 oy mobaynida 38 million marotaba tomosha qilindi. Qo‘shiq qisqa vaqt ichida xit taronaga aylanib, ijodkorga kutilmagan omad olib keldi.
5-o‘rin
O‘zbek primoddonasi deya e’tirof etiluvchi xonanda Yulduz Usmonovaning yosh ijodkor Malik bilan kuylagan “Yor biyo” dueti 7 oy mobaynida 31 million marotaba tomosha qilindi. Dubayda olingan klip muxlislar tomonidan iliq qabul qilindi.
4-o‘rin
To‘rtinchi o‘rinni qisqa fursatda internet yulduziga aylangan ijodkor Jaloliddin Ahmadaliyev band etdi. Uning “Sog‘indim” taronasi yanvar oyida YouTube tarmog‘iga joylangandi. Klip shu kungacha 42 million marta tomosha qilingan. “Janonim” tarmonasi esa bir yilda 47 million marta ko‘rilgan.
3-o‘rin
Xonanda Imronning “Hech kimga bermay sevaman” klipi o‘tgan yil so‘nggida YouTube tarmog‘iga joylangandi. O‘tgan vaqt mobaynida klip 53 million marotaba tomosha qilindi.
2-o‘rin
O‘zbek san’atida Doston Ergashev nomining paydo bo‘lganiga ko‘p bo‘lgani yo‘q. Ammo ijodkor san’atda o‘z o‘rni va muxlislarini topishga ulgurdi. Aprel oyida YouTube tarmog‘iga joylangan “Ko‘zmunchog‘im” qo‘shig‘i o‘tgan vaqt mobaynida 59 million marotaba tomosha qilingan.
1-o‘rin
Hamdam Sobirovni 2022-yilda eng sermahsul ijod qilgan va ketma-ket xit qo‘shiqlarni yaratgan ijodkor deyish mumkin. Masalan, uning “Tentakcham” klipi 11 oy davomida 82 million marotaba tomosha qilingan. “20 mart” qo‘shig‘i esa 8 oy davomida YouTube tarmog‘ida 40 million marotaba tomosha qilingan. Mana buni haqiqiy omad va mo‘maygina daromad desa bo‘ladi.
Mavzuga doir:
Izoh (0)