“Xalqaro onlayn savdo platformalari orqali 1,5 mln dollarlik mahsulot sotildi” — “Hunarmand” uyushmasi raisi o’rinbosari Bobur Mansurov

O‘zbekistonda ishlab chiqarilgan milliy hunarmandchilik mahsulotlarini xalqaro onlayn platformalarida sotish orqali millionlab dollarlik eksport amalga oshirilmoqda. Bu haqda “Hunarmand” uyushmasi raisi o‘rinbosari Bobur Mansurov “Daryo” muxbiriga bergan qisqacha intervyusida aytib o‘tdi.

Bobur Mansurovning aytishicha, milliy hunarmandchilik mahsulotlari xalqaro internet do‘konlari orqali sotish ortib bormoqda.

Milliy hunarmandchilik mahsulotlarining onlayn savdosini yo‘lga qo‘yish uchun uzcrafts.uz, suzanishop.uz va ikatmarketing.com kabi internet magazinlari hamda ijtimoiy tarmoqlarda uzcraft.com kanal va guruhlari tashkil etildi.

Hunarmandchilik yo‘nalishida milliy urf odatlarimizni aks ettirgan “Chust Do‘ppi”, “Adras of Margilan”, “Karakul Fur”, “Rishtan Ceramics” kabi milliy brendlar yaratilib, bunday brendlar bilan 250 nafardan ortiq hunarmandlar Amazon, eBay va ETSY kabi platformalarga milliy hunarmandchilikning talab yuqori bo‘lgan 12ta yo‘nalishi bo‘yicha 5 mingdan ortiq mahsulotlar joylashtirilib, onlayn savdo hajmi 1,5 mln dollardan oshdi.

Hunarmandlarni onlayn savdo va turizm sohasida bilim va ko‘nikmalarini oshirish maqsadida xar bir hududda bir oyda 3-marta jami 42 ta o‘quv-seminar, treninglar tashkil etish orqali E-Commerse tizimida faoliyat yuritayotgan hunarmandlar sonini 220 nafardan 500 nafarga yetdi.

Ma’lumot uchun, O‘zbekistonning xorijiy davlatlardagi elchixona va vakolatxonalari ko‘magida MDH, Yevropa va AQSH davlatlariga hunarmandchilikning kulolchilik, kashtachilik, zardo‘zlik, yog‘och o‘ymakorligi, gilamchilik va qo‘lda gazlama to‘qish yo‘nalishlari bo‘yicha jami 13,2 mln dollarlik miqdoridagi mahsulotlar eksport qilingan.