O‘zbekistonda yana ikkita institut direktori lavozimidan ozod etildi

Oliy va o‘rta maxsus ta’lim vazirligi matbuot kotibi Termiz va Qarshidagi ikki oliy ta’lim muassasasi rahbari ishdan olinganini ma’lum qildi.

Unga ko‘ra, Eshbolta Qobulov Termiz davlat universiteti Pedagogika instituti direktori lavozimidan, Abduqahhor G‘aniyev Qarshi davlat universitetining Pedagogika instituti direktori lavozimidan ozod etilgan.

Oliy va o‘rta maxsus ta’lim vazirining 2021-yil 3-maydagi buyrug‘i bilan Eshbolta Qobulov Termiz davlat universitetining Pedagogika instituti direktori lavozimiga tayinlangandi.

Eshbolta Qobulov 1960-yil Surxondaryo viloyatida tug‘ilgan. Termiz davlat pedagogika instituti (1988-yil)ni tamomlagan. Tarix fanlari doktori, dotsent. Shu kunga qadar Termiz davlat universitetining Tarix fakulteti dekani lavozimida ishlagan.

Oliy va o‘rta maxsus ta’lim vazirining 2021-yil 25-iyundagi buyrug‘i bilan Abduqahhor Gadoyevich G‘aniyev Qarshi davlat universitetining Pedagogika instituti direktori lavozimiga tayinlangan.

Abduqahhor G‘aniyev 1974-yilda Toshkent davlat universitetini tamomlagan. Fizika-matematika fanlari nomzodi, dotsent. Shu kunga qadar Toshkent davlat pedagogika universitetining Shahrisabz filiali direktori lavozimida ishlagan.

Mavzuga doir: O‘zbekistonda ikki nafar oliygoh rektori ishdan olindi