Turkiya prezidenti Rajab Toyyib Erdo‘g‘on Anqara Qora dengizda yangi gaz konini topganini ma’lum qildi. Endi, prezidentning so‘zlariga ko‘ra, Turkiya gazi zaxiralari 710 milliard kubometrni tashkil qiladi.
Turkiya yetakchisi ma’lumotlariga ko‘ra, topilgan gaz qiymati 1 trillion dollarga teng. Anqara O‘rtayer dengizi, Kaspiy va Yaqin Sharqning energetika markaziga aylanmoqchi, dedi Erdo‘g‘on.
“Bizning Fatih burg‘ilovchi kemamiz ‘Chayjuma-1’ qudug‘ini burg‘ilash chog‘ida suv ostida 3023 metr chuqurlikda 58 milliard kubometrga teng tabiiy gaz zaxiralarini aniqladi”, — dedi davlat rahbari.
“Bizning yakuniy maqsadimiz — iloji boricha tezroq neft va tabiiy gazga nisbatan tashqi bog‘liqligimizga barham berish. Biz Turkiyani O‘rtayer dengizi, Kaspiy va Yaqin Sharqning energetika markaziga aylantirishga qat’iy bel bog‘ladik. Biz Sharq va G‘arbni nafaqat Istanbul va Dardanelldagi ko‘priklarimiz bilan, balki energetika ko‘priklarimiz bilan ham birlashtiramiz”, — dedi Erdo‘g‘on.
Dekabr o‘rtalarida Turkiya prezidenti 12 milliard dollarlik 150 million barrel neft bo‘lgan kon aniqlanganini ma’lum qilgandi. Iyulda ham Anqara mamlakat janubida Chukurova neft konini kashf qilgandi. Turkiya Energetika vazirligi ma’lumotlariga ko‘ra, u yerda topilgan neft miqdori — 7,5—8 million barrelga teng.
Izoh (0)