Pentagonning ba’zi rasmiy shaxslari Kremlga “boshini tanidan judo qiladigan zarba” (“rahbarsiz qoldiradigan zarba”) berish bilan tahdid qilgan, bu esa Rossiya prezidentini jismoniy jihatdan bartaraf qilishni anglatishi mumkin. Bu haqda Rossiya tashqi ishlar vaziri Sergey Lavrov ma’lum qildi. Uning so‘zlariga ko‘ra, G‘arbning Rossiyani tiyib turishga qaratilgan siyosati o‘ta xavfli va yadro davlatlari o‘rtasida to‘g‘ridan to‘g‘ri qurolli to‘qnashuv xavfini keltirib chiqaradi.
“Vashingtondagilar hammadan ham uzoqqa bordi: u yerda Pentagonning qandaydir ‘o‘z ismini oshkor qilmagan rasmiy shaxslari’ Kremlga ‘boshini tanidan judo qiluvchi zarba’ berish bilan tahdid qildi, desa ham bo‘ladi, aslida gap Rossiya davlati rahbarini jismonan bartaraf etish haqida bormoqda. Agar bunday g‘oyalar haqiqatan ham kimlardir tomonidan pishitilayotgan bo‘lsa, ular bunaqa rejalarning ehtimoliy oqibatlari haqida yaxshilab o‘ylab ko‘rishi kerak”, — dedi Lavrov “TASS”ga bergan intervyusida.
Shuningdek, u Ukraina prezidenti Vladimir Zelenskiy “NATO mamlakatlarining Rossiyaga preventiv yadro zarbalari haqida kelishib olgani”ni aytdi. Vazir qayd etishicha, yadro urushida g‘oliblar bo‘lmaydi, “va u hech qachon boshlanmasligi kerak”.
“AQSHda va umuman, G‘arbda yadro quroli mavzusi atrofida propagandachilik vakxanaliyasi borligini chuqur tashvish bilan qayd etamiz”, — dedi Sergey Lavrov.
Rossiya tashqi ishlar vaziri fikricha, Ukraina AQSH va NATOning boshqa a’zolarini qurolli nizoga tortishga urinib, ularning Rossiya bilan “yuzma-yuz to‘qnash kelishi”ga umid qilmoqda. Uning aytishicha, Kiyev o‘z nazorati ostidagi hududlarni demilitarizatsiya va denatsifikatsiya qilish bo‘yicha talablarni yaxshilikcha bajarishi kerak, aks holda bu masalani Rossiya armiyasi hal qiladi.
Izoh (0)