Rossiya prezidenti Vladimir Putin Xavfsizlik kengashi rahbari o‘rinbosari Dmitriy Medvedevni yana bir lavozimga — Harbiy-sanoat komissiyasi raisining birinchi o‘rinbosarligiga tayinladi. Putinning tegishli farmoni huquqiy axborot rasmiy portalida e’lon qilindi.
Shu paytgacha Harbiy-sanoat komissiyasi haqidagi nizomga muvofiq, ushbu tuzilmada raisning birinchi o‘rinbosari lavozimi ko‘zda tutilmagan edi. Ushbu mansabni egallaydigan kishi komissiya majlislarini o‘tkazib, uning ichida kengashlar va ishchi guruhlarni tuzish huquqiga ega, deyiladi Putinning farmonida.
Rossiya armiyasi uchun qurol-yarog‘ ishlab chiqarishni muvofiqlashtiruvchi Harbiy-sanoat komissiyasi raisi Putinning o‘zidir.
Dmitriy Medvedev 2008—2012-yillarda Rossiya prezidenti, 2012—2020-yillarda esa bosh vazir lavozimlarini egallagan. 2020-yil yanvarida, bosh vazirlikdan iste’foga chiqqach, Medvedev Xavfsizlik kengashi raisi o‘rinbosariga aylandi. Bu lavozim u uchun maxsus yaratildi.
Rossiya Ukrainaga bostirib kirgach, Medvedev urushning eng agressiv tarafdorlaridan biriga aylandi hamda Putinning G‘arb va Ukrainadagi siyosiy raqiblariga nisbatan haqoratli jumlalarni qo‘llay boshladi. Shuningdek, Medvedev Rossiya mudofaa korxonalariga ko‘p marta tashrif buyurgan.
Eslatib o‘tamiz, Medvedev “Rossiyskaya gazeta”da “Bizning xalqimiz, yerimiz, haqiqatimiz” nomli maqolasini chop ettirdi va unda 6 band bilan 2022-yil yakunlarini sarhisob qildi. U Ukrainaning amaldagi rasmiylari bilan tinchlik muzokaralarini rad etdi va davom etayotgan yadroviy tahdid haqida gapirdi. Ammo u “oxirzamon hali kelmaydi”, deb ishontirdi.
Izoh (0)