Argentina terma jamoasi hujumchisi Lionel Messining Instagram’ga qo‘ygan rasmi ijtimoiy tarmoqlar orasida eng ko‘p layk yig‘gan postga aylandi. Surat qo‘yilgan vaqtdan hozirga qadar layklar soni 72 milliondan oshdi.
Jahon Chempionatida zafar quchganidan so‘ng Messining Instagram’ida jahon kubogini ko‘tarib tushgan surati paydo bo‘ldi. Bir necha kun ichida ushbu post shu vaqtga qadar Instagram’da eng ko‘p layk to‘plagan World Record Egg sahifasidagi tuxumning mashhur suratini (56 million) ortda qoldirdi.
Endi Messining posti Bella Porchning rekordini ham yangiladi. Qo‘shiqchining TikTok platformasiga 2020-yilda joylagan videosi 64 million layk yig‘ib, ijtimoiy tarmoqlar tarixida rekord qayd etgandi. Leo ushbu rekordni ham yangiladi.
Messi final bahsida 2 ta golni o‘z hisobiga yozdirib qo‘ydi va penaltilar seriyasida ham o‘z imkoniyatidan unumli foydalandi. Argentina bilan birga Jahon Chempionati sovrinini boshi uzra baland ko‘tardi.
Izoh (0)