Noqonuniy tamaki kontrabandasiga qarshi kurashish global muammolardan biri. Afususki, bu O‘zbekistonga ham begona emas. Oktabr oyida O‘zLiDep press klubida o‘tkazilgan muloqotda Alkogol va tamaki bozorini tartibga solish hamda vinochilikni rivojlantirish agentligi boshqarma boshlig‘i Komil Abdurahimov O‘zbekistonda so‘ngi ikki yil ichida noqonuniy tamaki mahsulotlari hajmi keskin ortganini aytgandi.
“O‘rganishlar shuni ko‘rsatdiki, noqonuniy sigaretalar aylanmasi hajmi so‘ngi ikki yil ichida 4 foizdan 15 foizga o‘sgan. Ayniqsa, vodiy viloyatlarida chegaradan kirib kelayotgan noqonuniy tamaki mahsulotlari ulushi katta. Masalan, Farg‘ona viloyatida respublika bo‘yicha 22,8 foiz, ya’ni eng yuqori ko‘rsatkich qayd etilgan.
Shuningdek, Toshkent viloyatida 15,4 foiz, Sirdaryoda 9 foizlik ko‘rsatkichlar aniqlangan. Tamaki mahsulotlari kontrabanda yo‘li bilan mamlakatga olib kirilayotgani sababli yiliga aksiz solig‘idan olinishi kerak bo‘lgan o‘rtacha 300 milliard so‘m mablag‘lar davlat budjetiga tushmay qolmoqda”, – dedi mutaxassis.
Davlat bojxona qo‘mitasining ma’lum qilishicha, 2022-yilning o‘tgan 11 oyi davomida qariyb 19 milliard 200 million so‘mlik 1 million 578 ming 346 quti noqonuniy tamaki mahsulotlari ushlab qolingan.
Mutaxassislar hamma gap iste’molchida ekanini aytib keladi. Muammoga eng asosiy yechim bunday noqonuniy mahsulotlarga bo‘lgan talabning yo‘qolishidir. Kontrabanda mahsulotlariga talab yuqori bo‘lsa, chegaradan noqonuniy olib o‘tishga urinishlar kamayib qolmaydi. Iste’molchi noqonuniy mahsulotlar xarid qilishdan voz kechsa, kontrabanda ham o‘z o‘zidan yakunlanadi.
Izoh (0)