“Hokimlarning reytingini ajrashishlar soniga bog‘lab qo‘ydik” – professor Barnogul Sanakulova

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 11-soni mavzusi “Tazyiq va zo‘ravonlik — nomardlik” bo‘lib, dastur mehmoni sifatida iqtisod fanlari doktori, professor Barnogul Sanakulova taklif etildi.

Jonli efir mobaynida Furqat Mahmudxo‘jayevning Barnogul Sanakulovaga o‘zi yashaydigan mahalla raisi bo‘lish haqidagi taklifiga javoban, professor o‘zini o‘qituvchilik, ilm-ziyo tarqatishda ko‘rishi va undan shu sohada ko‘proq foyda bo‘lishini ta’kidladi. Lekin “parda ortida” turib strategik qarorlar qabul qiladigan va maydonga chiqmaydigan jamoada ishlashga hamisha tayyorligini, bunday jamoa mahalla raisidan tortib, hokim, vazir, prezidentda ham bo‘lishi kerakligini aytdi.

“Masalan, biz juda yomon ko‘radigan, reytinglarda eng quyi pog‘onada turadigan hokimlar bor. Ularning PR kampaniyasi ayollar va bolalar zo‘ravonligiga qarshi kurashish keysi bilan ishlab, bu borada chora-tadbirlar ko‘ra boshlasa, kafolat beraman, shu hokimni yaxshi ko‘rib qolishadi. Mayli, piar bo‘lsa ham, shuning natijasida yuztadan ellikta ayolning masalasi hal qilinsa, oldinga bir qadam qo‘yilgan bo‘ladi. Hokim ham buning mazasini, bu orqali uning reputatsiyasi joyiga tushayotganini bilgach, chin dildan qilingan duolar, quvongan ko‘zlarni ko‘rgach, yaxshi, vijdonli hokimga aylanadi, deb hisoblayman.

Biz esa hokimning reytingini ajrashishlar soniga bog‘lab qo‘ydik. Menga bir hokim: “Men bu tartibga qarshiman, lekin nima qilay, ajrashishlar soni qanchalik ko‘p bo‘lsa, reytingim shunchalik pasayyapti, mas’ul xodimlarim ikki inson birga yashay olmasligini, kelajakda zo‘ravonlik jinoyati yuz berishi mumkinligini bilib tursa-da, ularni ajratmaslikka harakat qiladi. Chunki ajratsak, reyting tushib ketaveradi”, – deb aytdi.

Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.