Bugun, 17-dekabr kuni Uzbekistan Airways tomonidan xarid qilingan to‘rtinchi Airbus 321neo samolyoti “Toshkent” aeroportining mahalliy aviayo‘nalishlar terminaliga kelib qo‘ndi. Aviatsiya an’analariga muvofiq, yangi havo kemasi o‘t o‘chirish mashinalari yordamida suv arkasi bilan kutib olindi.
UK32105 ro‘yxatga olish raqamini olgan havo kemasi Airbus zavodlaridan biri joylashgan Gamburg shahridan (Germaniya) 6 soat-u 30 daqiqa ichida to‘g‘ridan to‘g‘ri Toshkentga Uzbekistan Airways ekipaji Murodjon G‘ulomov va Vladislav Argov boshqaruvida olib kelindi.
Yangi laynerni terminalda Transport vazirligi vakillari, aviakompaniya xodimlari, ommaviy axborot vositalari vakillari, aviaspotterchilar kutib olishdi. 188 yo‘lovchiga mo‘ljallangan A321neo samolyoti uzoq masofalar hamda mahalliy aviaqatnovlarda ekspluatatsiya qilinadi. Samolyotning maksimal uchish vazni 97 tonna va 6850 km bo‘lgan masofagacha parvoz qilishi mumkin.
Yangi havo kemalarini xarid qilish yo‘nalishlar tarmog‘ini kengaytirish va yo‘lovchilarni tashish hajmini oshirishga yordam beradi. Aviakompaniya havo kemalari parkini unifikatsiyalash Uzbekistan Airways AJ da transformatsiya jarayonlarini jadallashtirish bo‘yicha “yo‘l xaritasi”da belgilab berilgan. Uzbekistan Airways yangi yo‘nalishlarni ochishni, Yevropa va Osiyo mamlakatlariga avvalgi mashhur bo‘lgan yo‘nalishlarni qayta tiklashni rejalashtirmoqda. Aviakompaniya havo parkini yangi A321neo havo kemalari bilan to‘ldirish esa ushbu amalga oshiriladigan yo‘nalishlarda yaxshi yordam beradi.
“Samolyot 188 yo‘lovchiga mo‘ljallangan, shundan 16 ta o‘rin biznes, 172 ta ekonom toifani tashkil etadi. Xabaringiz bor, Uzbekistan Airways tomonidan 2021-yilning sentabridan boshlab kamxarjli tashuvlarni amalga oshirish boshlangan. Sababi yo‘lovchilarning biznesdan ko‘ra ekonom toifadagi chiptalarga talabi oshgan. Talabdan kelib chiqqan holda kompaniya tomonidan aynan kamxarj samolyotlarni sotib olishga qaror qilindi. 2022-yil yakunigacha yana bir shunday samolyot xarid qilish rejalashtirilgan. Bundan tashqari prezidentimiz Shavkat Mirziyoyevning Fransiyaga amalga oshirgan yuqori darajadagi tashriflari doirasida Uzbekistan Airways va Airbus o‘rtasida, Airbus oilasining 12 ta yangi samolyotini (shu jumladan A320neo va A321neo) sotib olish bo‘yicha 2029—2030-yillarda yetkazib berish sharti bilan kelishuvga erishilgan. Mana shu 10 yil ichida biz mazkur samolyotlarni ham qabul qilib olishimiz ko‘zda tutilgan.
Yangi samolyotlarning xarid qilinishi parvozlar xaritasiga ta’sir etadi. Agar hozirda dunyoning 40 ta shahriga parvozlar amalga oshirayotgan bo‘lsak, bu kelgusi yilda eng kamida yana 10 ta shahar qo‘shiladi, deganidir”.
Kamola Ikromova, Uzbekistan Airways AJ matbuot xizmati rahbari
Eslatib o‘tamiz, joriy yilning noyabrida Uzbekistan Airways va Airbus o‘rtasida Airbus oilasiga tegishli 12 ta yangi havo kemasini (jumladan, A320neo va A321neo) 2029—2030-yillarda yetkazib berish sharti bilan sotib olish bo‘yicha navbatdagi shartnoma imzolangan edi. Tadbir davomida ishtirokchilar va ommaviy axborot vositalari vakillari yangi avialayner va uning texnik xususiyatlari bilan yaqindan tanishish imkoniga ega bo‘ldi. Tadbirda fuqaro aviatsiyasi sohasi xodimlarining farzandlari ham ishtirok etdi.
Izoh (0)