“Yuzimga kislota sepishmoqchi bo‘lishgan”. 20 yoshli insta-bloger Liil Xurramov o‘ziga bo‘lgan tahdidlar haqida so‘zlab berdi (video)

O‘zbek Instagram olamida Liil taxallusi bilan mashhurlikka erishgan Ozod Xurramov “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Liil suhbat davomida unga bo‘lgan tahdidlar, hattoki yuziga kislota sepishmoqchi bo‘lganini ham gapirib berdi.

Birinchi marta meni reklamaga aldab chaqirishgan. Bitta o‘zi keladi deb o‘ylab, meni mashinaga solib olib ketishmoqchi bo‘lishgan, biz esa ko‘pchilik bo‘lib borgandik. Uddalay olishmagan.

Ikkinchisida vaziyat boshqacha bo‘lgan. Qizlar kelib atrofimni o‘rab olishib, rasm tushishyapti. Bir bola chetdan qarab turibdi, kelib rasm tushishga xijolat bo‘lgandek ko‘rindi. Bir qaradim, indamadim, asta-sekin yurib ketyapman, rasmga tushishyapti. Atrofimda odamalar ko‘payib borgan sari u tezlashish taraddudiga tushib qoldi.

Menga qarab tezlashib yurib kela boshladi. Unga bir qarab qo‘yaman, rasm tushaman, yana qarayman. Shu payt u cho‘ntagidan qora paketga o‘ralgan baklajkani oldi va og‘zini qaratib manga tutgan zahoti yerga o‘tirdim, atrofimda qizlar tik turibdi, men yerga boshimni egib o‘tirvolib, baqirdim. Baklajka ichidagi sachrab-sachramasdan chetga otib yuborib, keyin bola qochdi. Keyin borib hidlab ko‘rsak, u kislota ekan. Tasavvur qiling, agar u yuzimga tekkanida yuzim oqib ketardi.

Dushman bor, lekin kimligini ham bilmayman. Mashinamni ham ustiga kraskalar sepib ketishgan. Suvimni ichiga tomoqni kuydirib, pardasini yo‘qotib yuboradigan narsa solib ketishgan. Barmog‘imni tekkizganimda, achishib, kuygan. O‘sha suvni ichsam nima bo‘lardi?

Keyin yana bir vaziyat bo‘lgan. Yopiq akkauntlardan qayerga boryapman, kimlar bilan uchrashyapman, qayerdan chiqyapman, qanaqa taksiga o‘tiryapman, barcha xatti-harakatlarim tushirilgan rasmlar kelardi. Meni rasmga olishardi, o‘shani o‘zimga jo‘natardi va undov qo‘yardi. Har safar rasm jo‘natardi va undov qo‘yardi.

Menga bu qo‘rquv soladi. Xavotirlanaman. Hali kichkina bolaman, hech kimga yomonligim tegmagan. Hech kimning nasibasini yemayapman. Urushmayapman. Alloh berdi menga. Men hech narsa qilmadim, Xudoyim meni boshqaryapti. Xudoni o‘ziga tavakkal, lekin baribir qo‘rquv bor.

Buni oddiy odam qilmaydi, oddiy muxlisingiz qilmaydi. Buni normal tushunib turgan odam qilyapti. Xudoga shukr, hozir ancha tinchib ketdi. O‘tgan yili bo‘lgan, o‘tgan yilning o‘zida yordamchilar sonini ko‘paytirganman, haydovchilar olganman, majburlikdan qo‘riqchilar ham olganman. Keyin tinchib ketdi. Hozir umuman yolg‘iz yurmayman.

Ozod Xurramov, aktyor, bloger, xonanda