Liil Xurramov videokliplariga sarflanayotgan katta pullar va nima sababdan to‘yga chiqmasligi haqida (video)

O‘zbek Instagram olamida Liil taxallusi bilan mashhurlikka erishgan Ozod Xurramov “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Liil suhbat davomida videokliplariga sarflanayotgan pullar va nima sababdan to‘yga chiqmayotganiga oydinlik kiritdi.

Dastlab men Ozoda opaga taklif bildirganman, opa rad etganlar. Keyin o‘zlari menga syurpriz qilganlar. Qo‘shiqni Turkiyada yozdirganmiz. Klipiga ancha katta pul sarflangan, umumiy hisobda 15 ming dollar ketgan. Lekin Ozoda opaga ham, menga ham bu klip yoqmaydi. Klip biz o‘ylaganchalik chiqmagan.

Masalan, “Mandarin” qo‘shig‘imni klipi chiqdi. O‘sha klipimga 20 ming dollar ketgan, lekin u klipim ham yoqmaydi.

Men to‘yga chiqmadim, niyatim ham yo‘q, allaqachon chiqqan bo‘lardim shu paytgacha. Bir tanishimning to‘yiga borib qo‘shiq aytib, to‘yona sifatida sovg‘a qildim, pulga to‘yga chiqmadim.

Men birovlarni qo‘shig‘ini aytib, to‘yda pul ishlashni xohlamayman. O‘zi hali bitta mualliflik qo‘shig‘im borligi uchun to‘yga chiqolmayman. Masalan, ona haqida qo‘shig‘im bo‘lsa, chaqirishi mumkin. Lekin ona haqida aytsangiz, konkret pul ko‘zlab aytgansiz-da, onangizga atab aytmagansiz. Mana, ona haqida qo‘shiq chiqarayotganlarni ko‘pini bilaman, pul uchun aytishyapti.

Masalan, to‘yga chiqib, Shohruxxonning qo‘shiqlaridan aytyapti, Yulduz Usmonovaning qo‘shiqlaridan aytyapti, Ozoda opaning qo‘shiqlarini aytib chiqishyapti, to‘yga chiqish uchun repertuar qilishyapti. Men shu narsani xohlamayman. Men ularning mehnatiga pul terib yurishni xohlamayman. O‘zimning mehnatimga pul olishni yaxshi ko‘raman. Uning puli boshqacha bo‘ladi, uzoqqa yetadi.

Ozod Xurramov, aktyor, bloger, xonanda