Putin 20-dekabr kuni birinchi marta yangi hududlar rahbarlari bilan uchrashishi mumkin

Rossiya prezidenti Vladimir Putin 2022-yil oxirigacha DXR, LXR, Zaporojye va Xerson viloyatlari rahbarlari vazifasini bajaruvchilar — Denis Pushilin, Leonid Pasechnik, Yevgeniy Balitskiy va Vladimir Saldo bilan ularning yangi lavozimida birinchi marta uchrashadi. Bu haqda “Vedomosti” gazetasi o‘z manbalariga tayanib xabar berdi.

Kreml saytidagi ma’lumotga qaraganda, davlat rahbari ular bilan 30-sentabr kuni yuzma-yuz muloqot qilgan, o‘shanda Rossiya tarkibiga yangi hududlarning qabul qilinishi haqidagi shartnomalar imzolangan edi.

Prezident ma’muriyatiga yaqin manbalar qayd etishicha, Pushilin, Pasechnik, Balitskiy va Saldo bilan ish yuzasidan uchrashuv 20-dekabr kuni bo‘lib o‘tadi.

Rahbarlarning Putin bilan uchrashuvi rejalashtirilmoqda, biroq “hammasi prezident grafigiga bog‘liq”, dedi Davlat dumasining MDH masalalari bo‘yicha qo‘mitasi raisining birinchi o‘rinbosari Viktor Vodolatskiy. U LXR bilan aloqalar uchun ham mas’uldir.

Uning fikricha, hududlar rahbarlari prezident bilan hukumat federal hududiy organlari vakolatxonalarining ochilishini muhokama qiladi. Hukumat qaroriga ko‘ra, bu ish kelasi yil 1-iyunigacha yakunlanishi kerak.

Vodolatskiy aytishicha, Rossiya hukumati raisi o‘rinbosari Marat Xusnullin tomonidan tasdiqlangan qayta tiklash rejasining bajarilishi haqidagi masalalar ham muhokama etiladi.

Rossiya Ukrainadagi maxsus operatsiyani 24-fevral kuni boshladi. O‘shanda davlat rahbari uning maqsadi “Kiyev rejimi tomonidan sakkiz yil davomida tahqirlanib kelayotgan va genotsidga uchrayotgan odamlarni himoya qilish”, shuningdek, Ukrainani “demilitarizatsiya va denatsifikatsiya qilish” (qurolsizlantirish va natsizmni yo‘qotish)dan iborat ekanini aytgandi.

7-dekabr kuni Putin Ukrainadagi harakatlar natijasi ko‘rinishi uchun uzoq vaqt talab etilishi mumkinligini aytdi, ammo Rossiyada yangi hududlar paydo bo‘lganining o‘zi “baribir ko‘zga ko‘rinarli natija” ekanini ta’kidladi. SHuningdek, u Azov dengizi Rossiyaning ichki dengiziga aylanganini qayd etdi.