Parijda 70 dan ortiq davlat va tashkilotlar ishtirokida “Ukraina xalqi bilan birdamlik” nomli konferensiyasi bo‘lib o‘tdi. Konferensiya yakunida Fransiya prezidenti Emmanuel Makron Kiyev uchun 1 milliard yevrodan ortiq yordam yig‘ishga muvaffaq bo‘lganini ma’lum qildi.
“Parijdagi konferensiyada biz Ukrainaga yordam uchun 1 milliard yevrodan ko‘proq mablag‘ to‘pladik, pullar unga aprelgacha yuboriladi”, — deb yozdi Fransiya prezidenti Twitter’da.
Reuters agentligi Fransiya tashqi ishlar vaziri Katrin Kolonnaga tayanib, ushbu mablag‘ning 415 million yevroga yaqini Ukraina energetika sektorini tiklashga yo‘naltirilishini yozdi. Mablag‘lar shuningdek, ukrainaliklarni suv, qishloq xo‘jaligi mahsulotlari, sog‘liqni saqlash va transport bilan ta’minlashga ham sarflanadi.
Fransiya 2022-yilda jami hisobda Ukrainaga insonparvarlik yordami sifatida 200 million yevro yubordi va yaqin kunlarda Parij Kiyevga energiya ta’minotini tiklash uchun yana 76,5 million yevro ajratadi, deya qo‘shimcha qilgan Makron.
U Rossiya tomonidan boshlangan urush Ukraina, Yevropa va Birlashgan Millatlar Tashkiloti (BMT) kelishuvida belgilangan xalqaro norma uchun hayotiy xavf tug‘dirayotganini ta’kidlagan.
Parijdagi konferensiyada Ukraina prezidenti Vladimir Zelenskiy ham onlayn nutq so‘zlagan va Ukrainaga energetika obyektlarini tiklash uchun kamida 1,5 mlrd yevro kerakligini aytgan.
Izoh (0)