BMT bosh kotibi o‘rinbosari Martin Griffits Xersonga tashrif buyurdi

BMT bosh kotibi Antoniu Guterrishning o‘rinbosari Martin Griffits Xersonga tashrif buyurdi. Bu haqda BMT bosh kotibi vakili Stefan Dyujarrik ma’lum qildi.

BMT tashrif tafsilotlarini keltirib o‘tmadi. Griffits bosh kotibning gumanitar masalalar bo‘yicha o‘rinbosari va favqulodda yordam koordinatoridir.

Xerson viloyati gubernatori vazifasini bajaruvchi Vladimir Saldo tashkilot vakili Rossiya davlat chegarasini kesib o‘tish tartibini buzganini aytdi.

“Bugun Xersonga BMT bosh kotibining gumanitar masalalar bo‘yicha o‘rinbosari Martin Griffits keldi. Go‘yoki, BMTning gumanitar operatsiyalari samaradorligiga baho berish va havo sovishi fonida shahar infratuzilmasiga zarar yetishi bilan bog‘liq muammolarni o‘rganish uchun. Martin Griffitsning asl maqsadi — Xerson viloyatining Rossiya tarkibiga kirganini tan olmayotgan butun dunyo hamjamiyati nomidan harakat qilayotganini namoyish qilishdan iboratdir”, — deb yozdi Saldo Telegram’da.

30-sentabr kuni Vladimir Putin Rossiya tarkibiga to‘rtta yangi hududni, shu jumladan, Xerson viloyatini kiritish haqidagi shartnomalarni imzolagandi. 11-noyabr kuni Rossiya Dnepr o‘ng qirg‘og‘idan o‘z qo‘shinlarini olib ketishni yakunladi, o‘shanda Xerson Ukraina kuchlari nazorati ostiga o‘tdi.