Lui van Gal Argentinaga qarshi mag‘lubiyatdan so‘ng Niderlandiya bosh murabbiyligini tark etdi

Lui van Gal Niderlandiya terma jamoasini tark etmoqda.

Niderlandlar JCH—2022 1/4 finalida Argentinaga imkoniyatni boy berdi.

“Bosh murabbiylik faoliyatimni davom ettirmayman, men faqatgina shu davr uchun rozi bo‘lgandim. Shuning uchun ushbu o‘yin men uchun oxirgisi.

Vaqtimni ajoyib o‘tkazdim. Albatta, teng kurashgan holda mag‘lub bo‘lib, musobaqani tark etish og‘riqli”, — deydi 71 yoshli murabbiy.

Aprel oyidayoq Niderlandiya terma jamoasini 2023-yil 1-yanvarida Ronald Kuman qabul qilib olishi ma’lum bo‘lgandi.

Qayd etish kerak, Ronald 2018—2020-yillarda ham terma jamoani boshqargan. Niderlandiya uning qo‘l ostida 2019-yilning yozida Millatlar Ligasi finaliga qadar yetib borgan. O‘shanda jamoa hal qiluvchi bahsda Portugaliyaga 0:1 hisobida mag‘lub bo‘lgandi.