Argentina va Niderlandiya o‘rtasidagi bahs vaqtida stadionda bo‘lgan amerikalik jurnalist vafot etgan

Futbol bo‘yicha JCH—2022 chorak finalidan o‘rin olgan Argentina va Niderlandiya o‘rtasidagi bahsda (2:2, penaltilar seriyasida 4:2) baxtsiz voqea yuz berdi.

Amerikalik jurnalist, CBS xodimi va “Bekhem tajribasi” kitobi muallifi Grant Uol o‘yin vaqtida vafot etgan.

Bu haqida uning ukasi ijtimoiy tarmoqlarda ma’lum qildi. Shuningdek, AQSH futbol federatsiyasi ham jurnalistning o‘limini tasdiqladi.

Uol o‘yin oxirida Dohadagi stadionda yiqilib tushgan. Unga yordam ko‘rsatilgan.

Grantning ukasi uning sog‘ligi bilan muammosi bo‘lmaganini aytdi. Erik akasining o‘limiga ishonmayapti. Uning ta’kidlashicha, jurnalist Qatarda tahdidlarga uchragan va o‘ldirilish bilan qo‘rqitilgan.