Vazirlik ikki jurnalistni IIBga chaqirish rahbariyatning shaxsiy tashabbusi bo‘lganini aniqladi. Ularga tanbeh berilgan

“Oyina.uz” portali bosh muharriri o‘rinbosari Inobat Ahatova hamda “Gazeta.uz” nashri fotomuxbiri Shohruh Haydarovning yaqinlari IIB xodimlari tomonidan chaqirilgani haqida xabar berilgan edi. Ichki ishlar vazirligi axborot xizmati rahbari Shohrux G‘iyosov holat yuzasidan batafsil ma’lumot e’lon qildi.

Ma’lum bo‘lishicha, Samarqand viloyati Narpay tumani hamda Qashqadaryo viloyati Qarshi shahri IIB rahbariyatining shaxsiy tashabbuslari bilan jamoatchilik faollari tomonidan jamiyatdagi turli hodisalarga hamda vaqtinchalik qiyinchiliklarga xolis yondashishlarini so‘rab, I.Ahatova va SH.Haydarovning yaqinlari bilan suhbat uyushtirilgan.

Hozirgi kunda jamiyatda ochiqlik va shaffoflik ta’minlanishi, ijtimoiy hodisalarga tanqidiy yondashuv faqatgina quvvatlanadi. Aynan shuning uchun jamoatchilik va OAV vakillari bilan aloqalarni amalga oshirish ichki ishlar organlarining axborot xizmatlari orqali yo‘lga qo‘yilgan va ta’minlanib kelinmoqda.

Hurmatli jurnalistlar va jamoatchilik faollari,  yuqoridagi holat o‘rganildi va mas’ullarga tanbeh berildi, kelajakda ichki ishlar organlari xodimlarining jamoatchilik nazorati bilan bog‘liq faoliyatingiz bo‘yicha so‘rovlar yoki takliflar kelib tushganda, ichki ishlar organlarining axborot xizmatlariga bog‘lanishingizni so‘raymiz, — deyiladi bayonotda.