Energetika vazirligi matbuot xizmatining ma’lum qilishicha, o‘z vazifasiga mas’uliyat bilan yondashmagan korxonalar rahbarlariga hayfsan berildi.
Qayd etilishicha, 7-dekabr kuni vazirlikda Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari, shuningdek, prokuratura organlari hamda tizim korxonalari rahbarlari va mas’ul xodimlari ishtirokida kuz-qish mavsumini betalafot o‘tkazish bo‘yicha tuzilgan maxsus shtabning navbatdagi yig‘ilishi bo‘lib o‘tdi.
Unda hozirgi kunda energiya resurslari ta’minotidagi mavjud muammolar va ularning yechimlari, bu borada olib borilayotgan ishlar tanqidiy ko‘rib chiqildi. Yig‘ilishda maxsus shtab tashkil etilganiga qaramay, joylardagi hududiy shtablarning faoliyati talab darajasida tashkil etilmaganiga alohida urg‘u berildi.
Ayrim mas’ul rahbarlarning dolzarb muammolarni tezkorlik bilan bartaraf etishda ishlarni to‘g‘ri tashkil qilmayotgani, buning oqibatida tizimda ko‘plab texnik nosozliklar sodir bo‘layotgani, energiya tejamkorlik masalalarida kamchiliklarga yo‘l qo‘yilayotgani hamda elektr ta’minotida cheklovlarni kiritishda belgilangan tartiblarga rioya etilmayotgani iste’molchilarning haqli e’tirozlariga sabab bo‘layotgani tanqid qilindi.
Shu va boshqa kamchiliklarga yo‘l qo‘ygani uchun “O‘zbekiston milliy elektr tarmoqlari” AJ boshqaruvi raisi Dadajon Isakulov, “Hududiy elektr tarmoqlari” AJ boshqaruvi raisining birinchi o‘rinbosari Ro‘ziqul Rayimov, “Qashqadaryo hududiy elektr tarmoqlari korxonasi” filiali direktori Anvar Muzapov va “Toshshaharnur” DUK direktori Umidbek Rajabovga hayfsan berildi.
Yig‘ilishda yoqilg‘i-energetika tarmog‘idagi muammolarni bartaraf etishda ko‘rilayotgan chora-tadbirlarni vijdonan amalga oshirish va buning natijasida iste’molchilarni barqaror energiya resurslari bilan ta’minlash bosh mezon ekani, bunda esa sohada ijro intizomi masalasi nihoyatda muhimligi alohida ta’kidlandi.
Izoh (0)