O‘zbekiston bosh vaziri o‘rinbosari, energetika vaziri Jo‘rabek Mirzamahmudov energota’minotdagi uzilishlar yuzasidan izoh berdi.

Jo‘rabek Mirzamahmudovning so‘zlariga ko‘ra, hozirgi ob-havo sharoiti jiddiyroq talafotlarning oldini olish maqsadida rejali cheklovlar o‘rnatishni taqozo etmoqda.

To‘g‘ri, e’tirozlar bor — elektr hammaga ham yetib bormayapti. Juda ko‘p o‘chishlar bo‘lyapti.

Lekin biz buni tan olamiz, inkor etmaymiz. Bu bo‘yicha rejali, tizimli ishlar qilib, hozirgiday ob-havo sharoitida cheklovlar kiritgan holda chiqib ketmasak, ertaga bundan-da jiddiyroq talafot bo‘lishi mumkin. Shuning uchun keskin choralar ko‘rishga majburmiz, — deydi vazir.

Jo‘rabek Mirzamahmudov, shuningdek, Farg‘onaning O‘zbekiston tumanidagi sement zavodi ishchilarining internetda tarqalgan jamoaviy murojaatiga ham munosabat bildirdi.

Boshqa alternativ yoqilg‘ida ishlashi mumkin bo‘lgan barcha obyektlar havo keskin shunaqa paytda tarmoqdan uziladi. Bu yerda biroz bo‘rttirib gapirilgan, 10 mingta ishchi ishsiz qolyapti deb. Bu sement ishlab chiqarish korxonasining 10 mingta emas, yuzdan sal oshiqroq ishchilari bo‘lgan.

Hamma biladiki, Vazirlar Mahkamasining tegishli qarori bor, g‘isht zavodlari, yangidan qurilayotgan sement zavodlar barchasi ko‘mir, ya’ni alternativ yoqilg‘ida ishlashi kerak. Hozir bu zavodni tabiiy gazga kim ulagan, kim ruxsat bergan, buni alohida o‘rganib chiqamiz. Lekin korxona rahbarlari shartnoma shartlariga ko‘ra vaqtida ogohlantirilgan. Ishchilar bilan tegishli targ‘ibot ishlarini olib borishi kerak edi, – degan u.