Toshkentda zo‘ravonlikka qarshi kurash bo‘yicha xalqaro anjuman — suratlarda

6-dekabr kuni Toshkentda zo‘ravonlikka qarshi kurashni institutsionalizatsiya qilish bo‘yicha xalqaro anjuman bo‘lib o‘tdi. “Daryo” fotomuxbiri Madina Nurman ushbu tadbirda qatnashib, fotogalereya tayyorladi.

Tadbirda BMT bosh kotibining o‘rinbosari, BMTning Jenevadagi vakolatxonasi bosh direktori Tatyana Valovaya, Prezident administratsiyasi Ijro etuvchi apparatining Kommunikatsiyalar va axborot siyosati bo‘yicha shu’ba mudiri Saida Mirziyoyeva, Oliy Majlis Senati raisi Tanzila Norboyeva, BMT doimiy koordinatori vazifasini bajaruvchi va YuNISEFning O‘zbekistondagi vakolatxonasi rahbari Munir Mamedzade, Yevropa Ittifoqining O‘zbekistondagi vakolatxonasi rahbari Sharlotta Adrian, tegishli davlat organlari va nodavlat sektor vakillari, xalqaro tashkilotlar ekspertlari, shuningdek, OAV vakillari va blogerlar ishtirok etdi.

Konferensiyada gender zo‘ravonlikka qarshi kurashish bo‘yicha idoralarni samarali muvofiqlashtirish zarurati, xotin-qizlar huquqlarini institutsional himoya qilishda xotin-qizlar masalalari bo‘yicha tegishli qo‘mitaning roli, huquqni muhofaza qilish organlari tomonidan ayollarni himoya qilish mexanizmlari kabi dolzarb mavzular ko‘tarildi va muhokama qilindi.

Tatyana Valovaya o‘z nutqida “so‘nggi o‘n yilliklar davomida erishilgan sezilarli yutuqlarga qaramay, barqaror rivojlanishning beshinchi maqsadi — gender tengligi hamda ayollar va qizlarning imkoniyatlarini kengaytirish hali ham kundalik amaliyotga tatbiq etilishdan uzoqdadir. Bu sohada jamoaviy harakatlarimizni kuchaytirish kerak”, — deb ta’kidladi.

O‘zbekistonning gender tengligi, shuningdek, ayollarga nisbatan kamsitish, tazyiq va zo‘ravonlikka barham berish sohasidagi masalalarni hal etishni faollashtirish borasidagi sa’y-harakatlarini alohida ta’kidlamoqchiman. Siyosiy, iqtisodiy, ijtimoiy va madaniy sohalarda muhim yutuqlarga erishildi. Milliy ayollar harakati va fuqarolik jamiyatining birlashishi mamlakat ichida va undan tashqarida ayollar va qizlarning huquq va imkoniyatlarini kuchaytirish bo‘yicha ta’sirchan tashabbuslarning amalga oshirilishiga hissa qo‘shdi, — deb aytdi Tatyana Valovaya.

Tadbirda ayollar oilaviy zo‘ravonlikdan o‘zni xavfsiz his qilishi va o‘z salohiyatini ro‘yobga chiqarishi mumkin bo‘lgan shelterlar faoliyati kabi muhim institutsional jihatga katta e’tibor qaratildi.

Bundan tashqari, OAV faoliyatida ayollar va erkaklar teng huquqliligi kafolatlarini ta’minlashga bag‘ishlangan muhokamalar ham bo‘lib o‘tdi.