Kamerun futbol federatsiyasi rahbari Samyuel Eto’O Qatardagi stadion yaqinida blogerning yuziga oyog‘i bilan zarba berdi.

Braziliya va Janubiy Koreya o‘rtasidagi bahsdan so‘ng (4:1) sobiq futbolchi va yosh yigit o‘rtasida mojaro kelib chiqdi.

41 yoshli kamerunlik stadionni tark etayotganda muxlislar u bilan suratga tushish uchun yoniga kela boshladi. Ularning orasida kamera ko‘targan yigit paydo bo‘ldi va Eto’Oni suratga ola boshladi.

Qayd etilishicha, bu yigit jazoirlik taniqli bloger bo‘lgan. U Kamerun futbol federatsiyasi rahbariga JCH—2022 saralashidagi o‘yin borasida turli savollarni bergan.

Eslatib o‘tamiz, Kamerun JCH—2022 o‘tish o‘yini doirasidagi birinchi bahsni o‘z uyida qabul qilgan va unda Jazoirga 0:1 hisobida yutqazgan. Javob uchrashuvida Kamerun 2:1 hisobda g‘alaba qozongan va mundial yo‘llanmasiga ega bo‘lgan. Mazkur o‘yinda hakamlarning qarorlari keskin noroziliklarga sabab bo‘lgandi.