O‘zbekistonda dekabr oyining boshidanoq qor yog‘moqda va harorat minus darajaga tushib ketdi. Buning ortidan tabiiy gaz bosimi tushib, elektr energiyasida uzilishlar kuzatilmoqda.
Toshkent shahri hokimligi energiya resurslari yetishmovchiligi ortidan gaz quyish shoxobchalarini noma’lum muddatga yopdi. Tabiiyki, ushbu jarayonda jamoat transportiga yuklamalar ortmoqda.
Xo‘sh, qishning izg‘irin va yog‘ingarchilikka boy kunlariga poytaxt qanchalik tayyor? Kommunal, yo‘l va energiya yetkazib berish xizmati-chi? Mavzu yuzasidan Toshkent aholisining ayrim vakillariga yuzlandik.
Mazkur so‘rovnomada ishtirok etgan fuqarolardan birining ta’kidlashicha, qishga endi tayyorlanishayotgan bo‘lsa kerak, chunki gazni ham o‘chirib turishibdi. Benzinda yuribmiz deb, taksilar ham qimmatlashib ketganini aytdi.Fuqarolardan biri esa poytaxt hali tayyor emas ekanini, tanishlarining uyida 4-5 kundan beri gaz yo‘qligini, o‘zining uyiga esa ehtiyot chora sifatida qo‘shimcha isitish asboblarini olib kelib qo‘yganini qayd etdi.
Fuqarolarning ayrimlari esa poytaxt tayyor bo‘lmasa ham, aholining o‘zi sharoit yaratib oladi degan fikrda. Ulardan biri “qor sabab yo‘llarda tirbandliklar ko‘payib, odamlar ish va o‘qishga kech qoladi” deb, hali qishga tayyor emas ekanini ta’kidladi.
“Shahar tayyor, faqat taksilar tayyor emas ekan, taksi chaqirsak kelmayapti”, — deydi yo‘lovchi ayol.
Izoh (0)