Alisher Navoiy nomidagi Kinochilar uyida 3-dekabr, shanba kuni futbol bo‘yicha dunyodagi eng sovrindor jamoa hisoblanuvchi “Matonat” nogiron-amputantlar jamoasi haqidagi “Matonat. Mashaqqatli g‘alaba” hujjatli film premyerasi bo‘lib o‘tdi.
Tadbirda ishtirok etgan “Matonat” nogiron-amputantlar futbolini rivojlantirish markazi rahbari Rustam Rahmatovich Mehmonov quyidagi fikrlari bilan o‘rtoqlashdi.
“Bu yigitlar matonat ko‘rsatishdi. Ular qanday qilib shu darajaga chiqa olishdi? Ular kamchiligi bo‘lgan taqdirda ham, hayotga, futbolga o‘z mehrini bergan holda qo‘rqmasdan dunyo maydonlarida futbol o‘ynab kelishyapti. Chunki ular futbolni juda sevishadi. Yigitlar Jizzaxdan, Krasnogorskdan, Nurafshondan, G‘azalkent, Bo‘kadan mashg‘ulotlarga kelishadi. Ularga qoyil qolmasdan iloj yo‘q”, — dedi Mehmonov.
“Matonat” futbol jamoasi 1988-yilda “Matonat Futbol” nogiron-amputantlar futbolini rivojlantirish markazi qoshida tashkil etildi va oradan ikki yil o‘tib, 1990-yilda AQSHdagi jahon chempionatida g‘olib chiqdi. Shundan so‘ng 1991-yil (O‘zbekiston), 2007-yil (Turkiya), 2010-yil (Argentina) va 2012-yillarda (Rossiya) bo‘lib o‘tgan jahon chempionatlarida o‘zbekistonlik oddiy yigitlar dunyo ahlini o‘ziga qaratib, g‘alabaga erishdi.
Bundan tashqari, klub 1988-yildagi jahon chempionatida kumush va 2002-yil hamda 2022-yillarda bronza medallarini qo‘lga kiritdi. Ushbu yigitlarning sharofati bilan O‘zbekiston nogiron-amputantlar futboli tarixidagi eng sovrindor jamoaga aylandi.
Film rejissori Komil Sharafiyevning so‘zlariga ko‘ra, film ishtiyoq, mardlik va g‘alaba haqida hikoya qiladi. Yigitlarning jismoniy holatiga qaramay ishlashi, hayot kechirishi va futbol o‘ynashi suratga olish jamoasini juda ham ilhomlantirdi.
Ularning boshidan o‘tgan hislarni, taassurotlarini tomoshabinga yetkazishga harakat qilindi. Bu yerda asosiy rolni operator Shuxrat Xabibullayev bajardi, uning xizmati bilan filmda badiiy qarorlar kamaytirilib, tabiiylik oshirildi.
Ushbu filmning homiysi va uning yaratilishiga InfinBANK katta hissa qo‘shdi. Film — InfinBANK’ning navbatdagi ijtimoiy tashabbusi natijasida “Matonat” futbol klubi bilan tuzilgan hamkorlik memorandumining bir qismi bo‘ldi.
Kelishuv doirasida amputant-futbolchilar o‘rtasida ilk O‘zbekiston chempionati “Mustaqillik Kubogi” o‘tkazildi va eng muhimi, bankning homiyligi ostida O‘zbekiston terma jamoasi shu yilning oktabr oyida Turkiyada o‘tkazilgan jahon chempionatida qatnashdi va bronza medalini qo‘lga kiritdi.
Izoh (0)