May oyida Samarqand viloyati IIB xodimi pogonini o‘zi yulib olib, qasddan ayolni aybdor qilishga uringan va shunga qaramay xodim hali hamon tizimda ishlamoqda. Holatga IIV izoh berar ekan, xodimning ushbu xatti-harakatlari yuzasidan o‘tkazilgan xizmat tekshiruvi natijasini prokuratura ko‘rib chiqqani va hech qanday e’tiroz bo‘lmagani bois shu qarorga kelingani ma’lum qilingan edi.
“Daryo” kolumnisti, huquqshunos Saidali Muxtoraliyev voqea tafsilotlari va mas’ullarning izohi qonunchilikka qay darajada muvofiqligi yuzasidan o‘z fikrlarini bayon qildi:
Mana bu videoda matbuot anjumanida jurnalistlar tomonidan berilgan savolga IIV mutasaddilari aravani quruq olib qochishibdi. Savolda o‘z pogonini yulib, bu holatni boshqa fuqaroga to‘nkamoqchi bo‘lgan ichki ishlar xodimiga qanday chora ko‘rilgani so‘ralgan.
IIV vakillaridan biri qo‘lidagi ma’lumotdan voqealar ketma-ketligini birin-ketin o‘qishni boshladi. Yakunda hujjatlar prokuraturaga topshirilgani va ichki ishlar organi xodimi bilan mojaroga borgan ayolning jinoiy javobgarlikka tortilgani aytildi. “Pogonyular” xodimga esa hech qanday chora ko‘rilmabdi va u hozir o‘z ishini davom ettirayotgan ekan. Jurnalistlar xodimga nima uchun chora ko‘rilmaganini qayta-qayta so‘radi. IIV vakillari bu bo‘yicha hujjatlar o‘sha paytda prokuraturaga topshirilganini va vaziyatga ular baho berishini, prokuraturadan ma’lumot olib, qo‘shimcha aniqlik kiritilishini bildirdi.
Prokuraturaning ishi — holat yuzasidan jinoyat alomatlari bo‘lsa, jinoiy ish qo‘zg‘atish va davlat ayblovini amalga oshirish, bu orqali jazo muqarrarligini ta’minlash. Aytmoqchi bo‘lganim, agar xodimga jinoyat ishi qo‘zg‘atilmagan bo‘lsa, demak uning taqdiri prokuraturaning vakolatidan tashqarida bo‘ladi. Bunday holatlarda mehnat qonunchiligiga ko‘ra xodimga nisbatan uning nojo‘ya xatti-harakatlari uchun intizomiy jazo qo‘llash, shu jumladan, uni intizomiy jazo sifatida ishdan bo‘shatish uni ishga qabul qilgan ish beruvchi tomonidan amalga oshiriladi. Ya’ni, nega baribir xodim ishdan bo‘shatilmagan?
Aslida “pogonyular” xodimning o‘sha ishi ishi ichki ishlar organi xodimining sha’niga putur yetkazuvchi xatti-harakat hisoblanadi. Kamida shunday. Prezidentning PQ-3413-sonli qarori bilan tasdiqlangan “Ichki ishlar organlarining intizom ustavi”ning 48-bandiga ko‘ra, odob-axloq qoidalarini qo‘pol ravishda buzish ichki ishlar organi xodimi sha’niga putur yetkazuvchi xatti-harakat sodir etish hisoblanadi. Boshqa fuqarolarni atayin aybdor qilish maqsadida o‘z pogonini yulib tashlash odob-axloq qoidalarini qo‘pol darajada buzish bo‘lmay nima?
O‘zbekiston “Ichki ishlar organlari to‘g‘risida”gi qonunining 32-moddasiga asosan ichki ishlar organi xodimining sha’niga putur yetkazuvchi xatti-harakatlar sodir etishi uni xizmatdan bo‘shatishga asos bo‘ladi. Xodim ichki ishlar organi xodimining sha’niga putur yetkazuvchi xatti-harakatlar sodir etsa, uning ishdan ketishiga oid yuqoridagi talablar prezidentning qarori bilan tasdiqlangan “Ichki ishlar organlarida xizmatni o‘tash to‘g‘risida”gi nizomning 144-bandi “k” kichik bandida ham keltirib o‘tilgan.
Mazkur nizomning 151-bandiga binoan podpolkovnik maxsus unvonigacha bo‘lgan xodimlarni xizmatdan bo‘shatish ichki ishlar vaziri yoki xizmatga qabul qilish vakolatiga ega boshliqning buyrug‘i bilan amalga oshiriladi. Shunga ko‘ra, xodimning ishdan olinishi yoki olinmasligiga prokuraturaning hech qanday aloqasi yo‘q.
Afsuski, so‘nggi paytlarda joylarda ichki ishlar xodimlarini arzimagan sabablar bilan tizim sha’niga putur yetkazdi, deb ishdan bo‘shatib tashlash holatlari kuzatilmoqda. Biroq hozirgi keysga kelganda yaqqol sharmandagarchilik uchun xodimga bunday chora ko‘rilmagani “o‘rtada nimadir bor-ov” degan shubha-gumonlarni tug‘dirmoqda.
Izoh (0)