Enter Engineering, ijtimoiy mas’uliyatli kompaniya bo‘lgani holda, aholining eng himoyaga muhtoj qatlamlari moddiy-ma’naviy qo‘llab-quvvalash maqsadida doimiy ravishda keng ko‘lamli xayriya tadbirlari o‘tkazib keladi. Xususan, ko‘makka muhtoj kishilarga bevosita yordam qo‘lini cho‘zish xayrli an’anaga aylangan.
2-dekabr kuni, Xalqaro nogironlar kuni arafasida Enter Engineering va Humo Arena ko‘p funksiyali muz saroyi tomonidan tashkil etilgan navbatdagi xayriya tadbiri bo‘lib o‘tdi. Tadbir doirasi Toshkent shahar Yakkasaroy tumani nogironlar jamiyatining 50 nafar a’zosi va ularga hamrohlik qilgan kishilardan iborat guruh muz saroyiga tashrif buyurdilar.
Humo Arena ga qulay avtobuslarda yetib kelgan mehmonlar samimiylik ila kutib olindi, har bir yehmonda uyg‘ongan ko‘tarinki kayfiyat tadbir davomigacha saqlanib turdi.
Mehmonlarni qarshilash marosimidan so‘ng ular uchun muz saroyining e’tiborga sazovor joylari bo‘ylab ekskursiya tashkil etildi, ushbu go‘zal inshootning bunyod etilishi tarixi haqida batafsil ma’lumot berildi. Shuningdek, mehmonlarda muz saroyida mavjud retro-avtomobillar muzeyi va sport musobaqalarida qo‘lga kiritilgan sovrinlar ko‘rgazmasi unutilmas taassurot qoldirdi. Mehmonlar uchun “Xumo” professional xokkey klubining ko‘rgazma mashg‘ulotlari ko‘rsatildi.
Albatta, tadbirda bayram dasturxoni ham yozildi. Tashkilotchilar to‘kin dasturxon atrofida jam bo‘lgan mehmonlarni qoyilmaqom tarzda ta yyorlangan osh bilan siyladilar.
— Biz ushbu tadbirda ishtirok etganimizdan juda baxtiyormiz, — deydi Toshkent shahar Yakkasaroy tumani “Mehribonlik” nogironlarga ijtimoiy o‘zaro ko‘mak ko‘rsatish jamiyati raisi Zulfiya Yakubova. — Tashkilotchilarga barcha ishtirokchilar nomidan chuqur minnatdorchilik izhor etaman, bu Enter Engineering va Humo Arena ma’muriyati tomonidan ko‘rsatilayotgan birinchi insonparvarlik yordami emas, bunday g‘amxo‘rlik va mehr-muruvvat qalblarimizga quvonch bag‘ishlaydi. Eng muhimi, bu g‘amxo‘rlik chin yurakdan qilinayotganiga ishonchimiz komil!
Har bir ishtirokchi uchun alohida hozirlangan sovg‘alarning topshirilishi tadbirning yoqimli yakuni bo‘ldi. Tadbirga shaxsan tashrif buyurolmagan kishilarga sovg‘alar tashkilotchilar tomonidan manzilli tarzda yetkazib berildi.
Izoh (0)