Lionel Messi mundialdagi gollar bo‘yicha Maradonaga yetib oldi. Argentinaliklardan faqat bir futbolchi undan oldinda

Argentina terma jamoasi hujumchisi Lionel Messi JCH—2022 nimchorak finali doirasida kechgan Avstraliyaga qarshi bahsda (2:1) gol urdi.

Bu Messi uchun Jahon Chempionatlaridagi 9-gol bo‘ldi. Leo ilk bor mundial pley-off bosqichida to‘p kiritishga erishdi. Uning avvalgi 8 ta goli guruh bosqichida kiritilgandi.

Bu borada Messi Portugaliya terma jamoasi forvardi Krishtianu Ronaldudan (8) o‘zib ketdi va vatandoshi Diyego Maradonaga yetib oldi. Argentinalik futbolchilar orasida faqat Gabriel Batistuta (10) mundialda gol urish borasida undan oldinda. Umumiy rekord esa Germaniya sobiq hujumchisi Miroslav Klozega (16) tegishli.

Messi yirik musobaqalar (JCh/Kopa Amerika) doirasidagi gollari sonini 22 taga yetkazdi. Amerika Kubogida 35 yoshli futbolchi 13 ta gol urgan. Bu borada Messi Ronalduga yetib oldi. Krishtianu Yevropa chempionatida 14 ta, mundialda 8 ta to‘p kiritgan.

Lionel Argentina terma jamoasi safidagi 169-o‘yinini o‘tkazdi. Bu Janubiy Amerika mintaqasi futbolchilar orasida rekord natija hisoblanadi. Bu o‘yinlarda u 94 ta gol va 51 ta golli uzatma amalga oshirgan.