“Fazilat xonim va qizlari”, “Holavachchalar” seriali orqali tomoshabinlarning qalbidan joy olgan turk aktrisasi Afra Sarachog‘lu 2-dekabr kuni 25 yoshni qarshi oldi. “Lisa.ru” nashri shu munosabat bilan aktrisaning hayoti va ijodiga oid qiziqarli ma’lumotlarni taqdim etdi.
Millati
Aktrisaning ko‘plab muxlislari uning millati bilan qiziqadi, chunki Afraning tashqi ko‘rinishi turk ayollariga xos emas. Mashhur aktrisaning otasi va onasi turk, biroq uning ajdodlaridan biri boshqa millat vakili hisoblanadi. Afra esa bu haqda gapirmagan.
Otasidan nafratlanadi
Sarachog‘lu ota-onasi ajrashganida juda yosh bo‘lgan. Shundan keyin aktrisaning otasi qizining hayotiga kirmadi, onasi esa o‘zini va qizini ta’minlash uchun bir nechta ishlarda ishlashiga to‘g‘ri keldi. Afra otasidan nafratlanadi va hozirda u haqda hech narsani bilishni xohlamaydi.
Yoshligidan ishlagan aktrisa
Bo‘lajak aktrisa onasiga yordam berish va hech bo‘lmaganda hayotini biroz osonlashtirish uchun yarim kunlik ish qidirishi kerak bo‘lgan.
Kino olamidagi orzular
Afra bolaligidan aktrisa bo‘lishni orzu qilgan. U turli xil obrazlarni sinab ko‘rdi, sahnalashtirdi, oilasi va do‘stlari oldida chiqish qildi. Afra bir kun kelib orzusi ro‘yobga chiqishiga ishondi, shuning uchun Anadolu universitetiga o‘qishga kirdi va u yerda aktyorlik mahorati bo‘yicha tahsil oldi.
Omadli imkoniyat
Afra filmdagi debyutini prodyuser O‘zjan Denizning ijtimoiy tarmog‘idagi “Ikkinchi imkoniyat” filmiga kasting haqida gapirgan postini ko‘rgan onasi tufayli qilgan. Afraning onasi O‘zjanga xat yozib, aktrisa bo‘lishni orzu qilgan qizi haqida gapirib bergan.
Sarachog‘lu kastingga taklif qilingan. U kastingga onasi bilan ertalab soat beshda borgan, biroq tushlikdan keyin sinovdan o‘tishga kirgan. Afra sinovni muvaffaqiyatli topshirgan va ikkinchi darajali rolni olgan. U shu orqali kinoga kirib kelgan.
Eng yaxshi rollari
Sarachog‘lu keyingi loyihada, ya’ni “Yomon yigit” serialida bosh rolni ijro etdi. Aktrisa “Fazilat xonim va qizlari” seriali suratga olinganidan keyin mashhurlikka erishdi va u ushbu loyihada ham bosh qahramonlardan birini gavdalantirdi.
Yuqori reytingli loyihasi
Hozirda aktrisa yuqori reytingga ega bo‘lgan “Yalı Çapkını” teleserialida suratga tushmoqda. Turk filmlari muxlislari loyihaning mashhur “Eshigimni qoq” serialidan, Afra esa Xande Ercheldan ustun turishi uchun barcha imkoniyatlarga ega ekaniga ishonchi komil.
Erkaklarga ishonchsizlik
Afra xuddi otasi kabi unga xiyonat qilishlaridan qo‘rqib, erkaklar va yigitlarga ishonmaganligini aytgan.
Shaxsiy munosabatlar
Sarachog‘lu uzoq vaqt davomida shaxsiy hayoti haqida gapirmagan va shu bilan birga, uning serialdagi hamkasblari, jumladan, “Fazilat xonim va qizlari” serialida birga suratga tushgan Chag‘lar Ertug‘rul bilan munosabatlari haqida mish-mishlar tarqalgan edi.
Biroq aktrisaning sevgilisi Mert Yazijio‘g‘lu bo‘lib chiqdi, Afra bilan tushgan suratlarini tez-tez ijtimoiy tarmoqlarda joylashtirmoqda. Afraning so‘zlariga ko‘ra, aktrisa u bilan uchrasha boshlaganidan keyin hamma erkaklar ham xiyonat qilmasligini tushuna boshlagan.
Sevimli mashg‘uloti
Afra Sarachog‘lu bo‘sh vaqtida sport bilan shug‘ullanishni, ayniqsa, voleybol o‘ynashni yaxshi ko‘radi.
Mavzuga doir: “Fazilat xonim va qizlari” yulduzi Afra Sarachog‘lu aktrisa ekanligidan afsuslanishi haqida so‘zlab berdi.
Izoh (0)