Toshkent viloyati Angren tumanida suv iste’molidan tushgan mablag‘larni o‘zlashtirish holati aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Angren shahar bo‘limi tomonidan “Toshkent suv ta’minoti” MCHJ Angren shahar bo‘limining murojaatiga asosan tergovga qadar tekshiruv o‘tkazilgan. Unda ushbu bo‘limning iste’molchilarga xizmat ko‘rsatish va suv sotish bo‘limi nazoratchilari SH.B., A.I., G.E., M.SH. va S.Q. aholidan suv iste’moli uchun jami 153,5 million so‘mni firibgarlik yo‘li bilan yig‘ib olib, o‘z ehtiyojlariga sarflab yuborgani aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Izoh (0)