“Daryo” kundaligida 2-dekabrda sodir bo‘lgan eng muhim voqealar
“Daryo” nashri 2-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
AQSH Rossiya bilan uchinchi jahon urushini boshlashni xohlamaydi
“AQSH Rossiya bilan urushmoqchi emas, Amerika prezidenti Jo Bayden Ukrainadagi mojaroning kengayishiga yo‘l qo‘yishni istamaydi”, — dedi AQSH Davlat kotibi Entoni Blinken. Uning so‘zlariga ko‘ra, AQSH va Rossiya aloqalarni saqlab qolmoqda. Avvalroq Bayden Rossiya prezidenti Vladimir Putin Ukrainadagi urushni yakunlashga qiziqish bildirgan taqdirdagina u bilan muzokaralar olib borishga tayyorligini aytgandi.
“Bayden uchun Ukrainadagi mojaroning kengayishiga yo‘l qo‘ymaslik muhim. Biz uni hech qanday tarzda kengaytirishni emas, aksincha yakunlashni xohlaymiz. Biz Rossiya bilan urushni xohlamaymiz, ayniqsa, uchinchi jahon urushini. Bunga intilayotganimiz yo‘q”, — dedi Blinken France 2 telekanaliga bergan intervyusida.
Jo Bayden 1-dekabr kungi matbuot anjumanida yaqin orada Vladimir Putin bilan bog‘lanmoqchi emasligini aytdi. U Putin Ukrainadagi harbiy mojaroga barham berish istagini bildirsagina, u bilan muzokaraga tayyor bo‘lishini qo‘shimcha qildi.
Putin muzokaralarga tayyor, ammo AQSH shartlariga ko‘ra emas
Rossiya prezidenti matbuot kotibi Dmitriy Peskov prezident Vladimir Putin Ukraina bo‘yicha muzokaralarga tayyor ekanini aytdi. Biroq uning so‘zlariga ko‘ra, muzokaralar boshlash uchun AQSH prezidenti Jo Bayden aytgan shartlarni qabul qilib bo‘lmaydi.
Peskov Ukrainadagi harbiy amaliyot davom etishini qo‘shimcha qildi. Avvalroq Bayden Ukrainadagi urush to‘xtatilgandan keyingina Putin bilan muzokara boshlashini aytgandi. “U (Bayden) birinchi navbatda Putin Ukrainani tark etishi kerakligini aytdi. Uning fikricha, bu Putinning muzokaralarga tayyorligini namoyish qiladi.
Ammo bu masala mohiyatini o‘zgartiradi. AQSH Rossiya Federatsiyasi tarkibidagi yangi hududlarni haligacha tan olmaydi. Bu esa albatta, o‘zaro munozara uchun asoslar izlashni sezilarli darajada murakkablashtiradi”, — dedi Dmitriy Peskov jurnalistlarning savoliga javoban.
Peskov Vladimir Putin muzokaralarga tayyor ekanini qo‘shimcha qildi: “Maxsus harbiy operatsiya davom etadi. Shu bilan birga, prezident Putin muzokaralar uchun ochiqligicha qolmoqda”. Uning so‘zlariga ko‘ra, Rossiya uchun hamon “tinch diplomatik vositalar” afzal.
Ukraina Qurolli kuchlari esa Rossiya qo‘shinlari Zaporojyening bosib olingan qismidan olib ketilayotganini e’lon qilgan
Ayni vaziyatda Ukraina Qurolli kuchlari Bosh shtabi e’lon qilgan ma’lumotida aytilishicha, Rossiya qo‘shinlari o‘zining alohida bo‘linmalarini Ukrainaning Zaporojye viloyatida bosib olingan hududlardagi ba’zi aholi punktlaridan olib ketmoqda. Rossiyalik harbiylar, shuningdek, hudud bosib olinganidan keyin tayinlangan mahalliy ma’muriyatlar xodimlarini ham evakuatsiya qilishga tayyorlanmoqda, deya da’vo qiladi Ukraina Bosh shtabi.
Ma’lumotda aytilishicha, Mixaylovka qishlog‘idan mahalliy politsiya bo‘limlari va o‘quv muassasasiga joylashib olgan bo‘linmalar chiqib ketgan. Burcha qishlog‘ida Rossiya tomonidan tayinlangan hukumat “aholini ixtiyoriy ravishda evakuatsiya qilish” uchun ro‘yxat tuzmoqda.Hozirda Rossiya Mudofaa vazirligi va Zaporojye viloyatining bosib olingan hududi ma’murlari Ukraina Qurolli kuchlari Bosh shtabi ma’lumoti yuzasidan izoh berganicha yo‘q.
Yevropa Ittifoqi O‘zbekistondagi sud jarayonlarini diqqat bilan kuzatmoqda
Yevropa Ittifoqi Qoraqalpog‘istonda iyul oyi boshida yuz bergan fojiali voqealar bilan bog‘liq harakatlarda ayblanayotgan 22 nafar shaxs ustidan Buxoro shahrida o‘tkazilayotgan sud jarayonini diqqat bilan kuzatmoqda. Bu haqda ittifoqning O‘zbekistondagi delegatsiyasi ma’lum qildi.
“Biz O‘zbekiston hukumatiga jarayonni jamoatchilik, shu jumladan, ommaviy axborot vositalari uchun ochiq va shaffofligini, hamda bevosita to‘g‘ridan to‘g‘ri translyatsiyani ta’minlagani uchun minnatdorchilik bildiramiz va jarayonning adolatli hamda xolis bo‘lishiga umid qilamiz.
Biz hukumat fikrni erkin izhor qilish va yig‘ilishlar erkinligi bo‘yicha, shu jumladan, GSP+ doirasidagi o‘zining majburiyatlarini bajarishga chaqiramiz. Shuningdek, Qoraqalpog‘istondagi voqealar bo‘yicha tergov komissiyasining ishlari natijasini yaqin kunlarda olishni sabrsizlik bilan kutmoqdamiz va ushbu natijalar jamoatchilikka e’lon qilinishiga umid qilamiz”, — deyiladi bayonotda.
