Yoshlar va tadbirkor ayollar yuqori salohiyatga ega: OTB urushning Markaziy Osiyodagi biznesga ta’siri bo‘yicha hisobot taqdim qildi

Rossiya—Ukraina mojarosining Markaziy va G‘arbiy Osiyodagi kichik biznesga ta’siri mintaqaning tadbirkorlik bazasini mustahkamlash bo‘yicha takomillashtirilgan strategiyalar zarurligini ko‘rsatadi. Bu haqda Osiyo taraqqiyot bankining (OTB) yangi hisobotida keltiriladi. 

Markaziy va G‘arbiy Osiyoda xususiy sektorda kichik va o‘rta korxonalar muhim rol o‘ynaydi. 2021-yilgacha mavjud ma’lumotlarga ko‘ra, ular barcha korxonalarning 98,9 foizini, ishchi kuchining 46,1 foizini, ishlab chiqarishning 40,7 foizini va jami eksportning o‘rtacha uchdan bir qismini (32,4 foizini) tashkil etgan. 

Markaziy va G‘arbiy Osiyodagi hukumatlar kichik va o‘rta biznes tashqi savdosini qo‘llab-quvvatlash, shuningdek, ichki tovar bozorlarini rivojlantirish bo‘yicha o‘z strategiyalarini yaxshilashlari kerak, — deydi OTB bosh iqtisodchisi Albert Park. 

Uning so‘zlariga ko‘ra, o‘sishga yo‘naltirilgan tadbirkorlarni qo‘llab-quvvatlash yangi samaradorlik imkoniyatlarini ochishga yordam beradi. 

Bu qo‘llab-quvvatlash yoshlar, ayollar, agrobiznes va texnologik startaplarga qaratilgan bo‘lishi kerak, — deydi Park

Hisobotga ko‘ra, kichik va o‘rta kompaniyalarni xalqarolashtirish va innovatsiyalarni rag‘batlantirish iqtisodiyotning tiklanishini tezlashtirishga hamda inklyuziv, barqaror o‘sishga erishishga yordam beradi. 

Yoshlar va tadbirkor ayollar mintaqadagi mehnat bozorlarini yaxshilash va inklyuziv o‘sishni jadallashtirish salohiyatiga ega, — deyiladi hisobotda. 

Shuningdek, raqamli ko‘nikmalar va infratuzilmani yangilash kichik biznesni moliyalashtirish manbalarini diversifikatsiya qilish bilan bir qatorda muhim ahamiyatga ega. 

Mintaqada kichik va o‘rta biznesni kreditlash bozori kichikligicha qolmoqda. 2015—2021-yillarda kichik va o‘rta va xususiy tadbirkorlik subyektlariga bank kreditlari o‘rtacha yalpi ichki mahsulotning 9 foizini va jami bank kreditlarining 31,4 foizini tashkil etdi.

Kichik kredit bozorlari hukumatlarni kichik va o‘rta biznesga moliyaviy yordam ko‘rsatishga undadi. 

Siyosat muhokamasining diqqat markazida subsidiyalar bilan qo‘llab-quvvatlanadigan moliyaga katta bog‘liqlikdan bozorga asoslangan moliyaga — kapital bozorlari va raqamli moliyaviy platformalarga o‘tish bo‘lishi kerak, — deyiladi hisobotda.