Toshkent markazidagi “Aloqabank”ka tegishli navbatdagi ofis auksionga qo‘yildi. Boshlang‘ich narx — 300 mlrd so‘m

Toshkent shahar, Mirobod tumani, Matbuotchilar ko‘chasidagi bino kimoshdi savdosiga qo‘yildi. Ma’lumotlar E-auksion portalida e’lon qilingan. 

Bino “Aloqabank”ning bosh ofisi bo‘lib, bank kuzatuv kengashining bayonnomasiga asosan auksionga chiqarilgan. 

Binoning yer maydoni 0,2 gektarni tashkil qiladi. Binoning umumiy maydoni — 7 345 kvadrat metr. Unda suv, elektr energiyasi ta’minoti va kanalizatsiya tizimi yo‘lga qo‘yilgan. Gaz esa mavjud emas. 3 qavatli bank binosi 2013-yilda qurilgan bo‘lib 169 ta xonadan iborat. 

Auksionga qo‘yilgan binoning boshlang‘ich bahosi — 302 mlrd so‘m. Arizalar 2023-yil 6-yanvar 09:00 ga qadar qabul qilinadi. Savdolar xuddi shu kuni 10:00 da boshlanadi.

“Aloqabank” Yashnobod tumanidagi ofisini ham qariyb 75 mlrd so‘mga kimoshdi savdosiga qo‘ygan edi. 

Avvalroq Toshkentdagi “An-Nur” to‘yxonasi MIB tomonidan auksionga qo‘yilgani haqida xabar berilgan edi.