Qalin tuman sababli Namangan aeroportida qator reyslar kechiktirildi

Uzbekistan Airports qalin tuman sababli 30-noyabr kuni Namangan aeroporti faoliyati cheklanib, qator reyslar kechiktirilganini e’lon qildi.

Ma’lum qilinishicha, Namangan xalqaro aeroportida qalin tumanda ko‘rinishning yomonligi (200 metr) tufayli reyslarni qabul qilish va jo‘natish vaqtincha cheklandi. Ikkita reys muqobil aerodromlarga yuborildi.

Xususan, Uzbekistan Airways’ning Krasnoyarsk—Namangan yo‘nalishi bo‘yicha HY9824 reysi mahalliy vaqt bilan soat 07:23 da Toshkent aeroportiga qo‘ndi. Ob-havo yaxshilanishi bilan Toshkentdan Namanganga, u yerdan esa Ufaga uchishi kutilmoqda.

Red Wings aviakompaniyasining Yekaterinburgdan Namanganga uchgan WZ1127 reysi soat 09:47 da Farg‘onaga qo‘ndi.

HY9858/073 Ufa—Namangan—Buxoro (taxminiy kelish vaqti — 14:30), HY74/47 Buxoro—Namangan—Samarqand (kelish — 19:05), HY48 Samarqand—Namangan (kelish vaqti — 23:00) reyslari ham ob-havo sharoiti tufayli kechiktirilishi kutilmoqda.