Janubiy koreyalik 23 yoshli Mina Syu Choy “Dunyo go‘zali–2022” go‘zallik tanlovi g‘olibi bo‘ldi. Bu haqda The Manila Times xabar berdi.
Xalqaro tanlovning final bosqichi 29-noyabr kuni Filippinda bo‘lib o‘tdi. Unda dunyoning turli davlatidan 89 nafar ishtirokchi qatnashdi. Mina Syu Choy ushbu tanlovda g‘olib chiqqan birinchi koreyalik ayol hisoblanadi. Shu bilan birga, “Havo go‘zali—2022” unvoni avstraliyalik Sheridan Mortlokka, “Suv go‘zali—2022” falastinlik Nadin Ayubga va “Olov go‘zali—2022” unvoni kolumbiyalik Andrea Agulera berildi.
“Dunyo go‘zali” tanlovida nafaqat tashqi ko‘rinish, balki ishtirokchilarning tabiatga bo‘lgan e’tibori ham hisobga olinadi. Chunki g‘olib kelgusi yil davomida BMTning Atrof-muhit dasturi vakili sifatida ishlashi, Butunjahon yovvoyi tabiat jamg‘armasi va boshqa tashkilotlar bilan hamkorlik qilishi kerak.
Shuning uchun tanlov veb-saytidagi so‘rovnomada har bir qiz o‘ziga ko‘proq yoqadigan hayvonni ko‘rsatadi. Bu yilgi g‘olib Mina Syu Choy esa mazkur so‘rovnomada delfinni keltirib o‘tgan.
Mina Syu Choy haqida nimalar ma’lum
Janubiy koreyalik Mina Syu Choy Avstraliyaning Sidney shahrida koreys oilasida tug‘ilgan va u yetti yoshigacha shu yerda yashagan. Keyin Seulga ko‘chib o‘tgan va mahalliy maktabda ta’lim olgan. Syu Choy ingliz tilida ko‘proq gaplashgani uchun tengdoshlari uni yaxshi qabul qilmagan. Lekin tez orada u moslashib, do‘stlar orttirishga muvaffaq bo‘lgan.
Syu Choy bir necha bor yashash joyini o‘zgartirgan. Uning Kanada, Avstraliya, AQSH va Janubiy Koreyada qarindoshlari bor. 2021-yilda u AQSHga ko‘chib o‘tgan va Illinoys universitetida muloqot san’atini o‘rganishni boshlagan. U shu yili “Koreya go‘zali—2021” unvonini olgan.
Mina koreys ekanligidan juda faxrlanishini tushuntirgan. U koreyslarni mehnatkash va taqdir sinovlariga dosh bera oladigan xalq deb hisoblaydi. Qiz butun dunyo xalqlarining Koreyaga va uning madaniyatiga qiziqishidan mamnunligini tan oldi.
Izoh (0)